İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 91 Hüküm no: 48 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Seyyid İbrahim Ağa b. Seyyid Ahmed’in bakkal dükkânı gediğini Ali Efendi b. Hacı Osman’a sattığı Odunkapısı’nda Keresteciler karşısında bakkāl Zikri âtî bakkāl dükkânı gedik âlâtının nısf-ı şâyi‘ına mâlik olan es-Seyyid el-Hâc İbrahim Ağa b. es-Seyyid Ahmed nâm kimesne meclis-i şer‘-i şerîf-i enverde bâ‘isü’l-kitâb Ali Efendi b. el-Hâc Osman nâm kimesne tarafından husûs-ı âti’l-beyânı tasdîka vekîl-i şer‘îsi Bakkāl İsmail Ağa b. el-Hâc İbrahim nâm kimesne mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Odunkapısı hâricinde keresteciler karşısında vâki‘ bir tarafdan berber dükkânı ve bir tarafdan abacı dükkânı ile mahdûd ve bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfı vekîl-i mezbûr İsmail Ağa’nın ve nısf-ı âharı benim yedimde iştirâken ve şâyi‘an mâlımız ve mülkümüz olmağla ben ber-minvâl-i muharrer mâlik olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle iki bin beş yüz guruşa müvekkil-i mezbûr Ali Efendi’ye bey‘ ü temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan nısf hisse-i şâyi‘ada benim kat‘a alâka ve medhalim kalmayup müvekkil-i mezbûr Ali Efendi’nin mâl-ı müşterâsı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 16 Z sene [12]37. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi ve gayruhum.