İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 92 Hüküm no: 49 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Odabaşı’nın, Ahmed Ağa b. Hüseyin’in yerine devâtçı esnafı kethudalığına tayini Devâtçı esnâfına kethudâ nasbı Mahmiye-i İstanbul’da Sultan Bâyezid Hân-ı Veli -âmelehullâhu te‘âlâ bi-lutfihi’l-hafî ve’l-celî- câmi‘-i şerîfi havlısının Mürekkebciler kapısı dâhilinde kâğıdçılar içinde ve mahâll-i sâirede vâki‘ bi’l-cümle devâtçı esnâfından el-Hâc Mehmed Emin Usta b. Hüseyin ve Mehmed Usta b. Veliyüddin ve es-Seyyid İbrahim Usta b. Mehmed ve es-Seyyid Salih Usta b. Feyzullah ve Mustafa Usta b. İbrahim ve Mehmed Emin Usta b. Mustafa ve es-Seyyid Mehmed Tâhir Usta b. Mehmed ve Ahmed Usta b. Ali ve Ali Usta b. Hasan ve Salih Usta b İbrahim ve Süleyman Usta b. Mustafa nâm kimesneler ve sâirleri meclis-i şer‘-i hatîr-i lâzımü’t-tevkīrde kethudâları el-Hâc Ahmed Ağa b. Hüseyin mahzarında esnâf-ı merkūmeden işbu bâ‘isü’l-kitâb es-Seyyid Ali Odabaşı b. Mustafa nâm kimesne hâzır olduğu hâlde her biri takrîr-i kelâm ve ifâde-i merâm edip mezbûr el-Hâc Ahmed Ağa bir müddetden beri esnâfımızın kethudâmız olup cümlemiz kendiden hoşnûd ve râzılar iken bu esnâda kethudâlık-ı merkūmdan rızâsıyla keff-i yed ve istifâ etmekle yerine esnâf-ı mezkûre üzerine bir kethudâ nasbı lâzım ve mühim olmağın emânet ile ma‘rûf ve istikāmet ile mevsûf ve her vechile kethudâlık uhdesinden gelmeğe kādir ve cümlemizin muhtârı olan hâzır-ı mezbûr es-Seyyid Ali Odabaşı esnâfımız üzerine kethudâ nasb ü ta‘yîn olunmak matlûbumuzdur dediklerinde mezbûr el-Hâc Ahmed Ağa dahi ba‘de’t-tasdîk hâkim-i hâsim ve’l-ecnâb veffakallâhu te‘âlâ bi’s-sıdk ve’s-savâb efendi hazretleri dahi hâzır-ı mezbûr es-Seyyid Ali Odabaşı’yı esnâf-ı mezkûre iltimâsları üzere kethudâ nasb ü ta‘yîn ve esnâfından bir ferdi hilâf-ı şer‘-i şerîf ve mugāyir-i şurût-ı nizâm tecrîm ve tekdîr etmemek üzere emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a [bi’t-taleb ketb olundu.] Fî 18 Z sene [1]237. Şühûdü’l-hâl: Muhzır Molla Hüseyin, Muhzır Molla Halil, Muhzır Molla Mahmud.