İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 93 Hüküm no: 51 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Sava v. Yuvan’ın bakkal dükkânı gediğin Yorgi v. Simyon’a sattığı Bakkāl Mahmiye-i İstanbul’da kâin bakkāl esnâfından Sava v. Yuvan nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden işbu bâ‘isü’s-sifr Yorgi v. Simyon nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Langa Yenikapısı kurbünde Dülbentçi Câmi‘-i şerîfi mahallesinde vâki‘ Selâm Çelebi ve Mehmed Efendi dükkânları demekle ma‘rûf ma‘lûmü’l-hudûd iki bâb bakkāl dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin her biri yüz yirmişer sehm i‘tibâriyle yüzer sehmi âharların ve mâ‘adâ yirmişer sehm-i şâyi‘-ı âharları akdi âti’z-zikrin sudûruna değin bâ-hüccet-i şer‘iye benim yedimde mâlım ve mülküm olmağla ben ber-minvâl-i muharrer mâlik olduğum yirmişer sehm hisse-i şâyi‘a-i mezbûrelerimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i âharlarım izniyle ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mersûm Yorgi zimmîye iki bin guruşa bey‘ ü temlik ve vech-i lâyıkı üzere her birini teslîm eylediğimde ol dahi yedimden ber-vech-i mübeyyen iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d mârrü’l-beyân dükkânlar derûnlarında mevcûde ber-i‘tibâr-ı mezkûr gedik ta‘bîr olunan âlât-ı lâzıme-i mezkûrelerin her birinin yirmişer sehminde benim kat‘a alâka ve medhalim kalmayup mersûm Yorgi zimmînin mâl-ı müşterâsı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 2 M sene [12]38. Şühûdü’l-hâl: Kâtib Ahmed Efendi, Bölükbaşı Abdi, Pazarbaşı Süleyman Ağa, Çakıroğlu Yorgi, Döğenci Lefter, Lazari, Yuvan, diğer Yuvan, Yazıcı Eftat, Kābız-ı mâl Simyon.