İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 93 Hüküm no: 50 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Mehmed Ali Ağa’nın, Yakub Ağa b. Süleyman’ın yerine bürüncükcü esnafı kethudalığına tayini Bürüncükçü esnâfına kethudâ nasbı Mahmiye-i İstanbul’da kâin bürüncükçü esnâfından Yiğitbaşı Ahmed Usta ve Ali Usta ve es-Seyyid Mehmed Râşid Usta ve es-Seyyid Mehmed Usta ve Mehmed Usta ve Süleyman Usta ve es-Seyyid Mehmed Emin Usta ve Mustafa Usta ve Ahmed Usta nâm Müslimîn ile re‘âyâ ustalarından Yiğitbaşı Artin ve Serkiz ve Sahak ve Hazeros ve Sahatek ve Agop ve Kigork nâm zimmîler ve sâirleri meclis-i şer‘-i hatîr-i lâzımü’t-tevkīrde kethudâları Yakub Ağa b. Süleyman nâm kimesne mahzarında işbu bâ‘isü’l-kitâb esnâf-ı merkūmeden Hafız Mehmed Ali Ağa b. Hasan hâzır olduğu hâlde her biri takrîr-i kelâm ve ta‘bîr ani’l-merâm edip merkūm Yakub Ağa bir müddetden beri esnâfımızın kethudâsı olup cümlemiz kendiden hoşnûd ve râzılar olduğumuz hâlde kethudâlık-ı merkūmdan istifâ ve keff-i yed etmekle yerine cümlemizin merzî ve muhtârımız ve örf ve âdetimize vâkıf ve nizâmımızı ârif hâzır-ı mezbûr Mehmed Ali Ağa esnâfımız üzerine kethudâ nasb ü ta‘yîn olunmak cümlemizin matlûbumuzdur dediklerinde mezbûr Yakub Ağa ba‘de’t-tasdîk hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri dahi merkūm Hafız Mehmed Ali Ağa’yı esnâf-ı mezkûrenin taleb ve iltimâsları ile üzerlerine kethudâ nasb ü ta‘yîn ve esnâfından bir ferdi hilâf-ı şer‘-i şerîf ve mugāyir-i şurût-ı nizâm te‘addî ve rencîde etmemek üzere emr ü tenbîh buyurduklarında ol dahi kethudâlık-ı merkūmu kabûl ve ber-mûceb-i emr ü tenbîh amel [11a] ve harekete ta‘ahhüd etmeğin mâ-vaka‘a bi’t-taleb [ketb olundu.] Fî 22 Z sene [1]237. Şühûdü’l-hâl: Muhzır Molla Mahmud, Muhzır Molla Halil, Muhzır Molla Hüseyin.