İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 99 Hüküm no: 56 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Seyyid İbrahim’in bakkal dükkânını Seyyid Ali Beşe b. Ali’ye sattığı Bakkāl Mahmiye-i İstanbul’da kâin bakkāl esnâfından es-Seyyid Mehmed Beşe b. es-Seyyid İbrahim nâm kimesne meclis-i şer‘-i şerîf-i enverde esnâf-ı mezkûreden işbu bâ‘isü’l-kitâb es-Seyyid Ali Beşe b. Ali nâm kimesne mahzarında ikrâr-ı tam ve takrîr-i kelâm edip mahmiye-i mahkiyede Eski Ali Paşa’da manav dükkânı karşısında kâin el-Hâc Hasan dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yetmiş dokuz buçuk sehmi âharların ve yirmi sehm ile rub‘ sehm hisse-i şâyi‘ası merkūm es-Seyyid Ali Beşe’nin ve mâ‘adâ yirmi sehm ile rub‘ sehm hisse-i şâyi‘ası akd-i âti’z-zikrin sudûruna değin benim yedimizde mâlımız ve mülkümüz olmağla ben zikr olunan âlât-ı lâzıme-i ma‘lûmeden ber-i‘tibâr-ı mezkûr mâlik olduğum yirmi sehm ile rub‘ sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i âharlarım izin ve icâzetleri ve bakkālân ve pazarbaşısı [12b] ve bölükbaşısı ve bi’l-cümle nizâm ustaları ma‘rifetleriyle beş yüz elli guruşa merkūm es-Seyyid Ali Beşe’ye bey‘ ü temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i mezkûrede benim kat‘a alâka ve medhalim kalmayup yirmi sehm ile rub‘ sehm hissesi mukaddemâ yirmi sehm ile rub‘ sehm hisse-i şâyi‘ası hâlâ şirâen ki cem‘an kırk buçuk sehm hisse-i şâyi‘a merkūm es-Seyyid Ali Beşe’nin mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 M sene [1]238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi.