İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 98 Hüküm no: 55 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozkırlı Ali Beşe b. Mustafa’nın kuruyemişci dükkânını Alâiyeli Derviş Hacı Mehmed b. Mustafa’ya sattığı Mukaddemâ peynirci ve hâlâ kuruyemişci Mahmiye-i İstanbul’da kâin kuruyemişci esnâfından Bozkırlı Ali Beşe b. Mustafa nâm kimesne meclis-i şer‘-i şerîf-i enverde esnâf-ı mezkûreden bâ‘isü’l-kitâb Alâiyeli Derviş el-Hâc Mehmed b. Mustafa nâm kimesne tarafından husûs-ı âtiyyü’l-beyânı tasdîka vekîl-i şer‘îsi Alemdaroğlu Ali Beşe b. Ahmed nâm kimesne mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı hâricinde kuruyemişciler sûkunun nihâyetinde Havâss-ı refî‘a’ya giden kayıkçılara mahsûs iskele hizâsında vâki‘ ma‘lûmü’l-hudûd mukaddemâ peynirci ve hâlâ kuruyemişci bir bâb dükkân derûnunda mevcûde beyne’l-esnâf gedik ta‘bîr olunur kuruyemişci âlât-ı lâzıme-i ma‘lûmesinin yüz yirmi sehm i‘tibâriyle doksan sehm hisse-i şâyi‘ası müvekkil-i merkūm Derviş el-Hâc Mehmed’in ve mâ‘adâ otuz sehm hisse-i şâyi‘ası bâ-hüccet-i şer‘iye benim yedimizde iştirâken mâlımız ve mülkümüz olmağla ben ber-minvâl-i muharrer akd-i âti’z-zikrin sudûruna değin mâlik olduğum otuz sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ile üç bin altmış iki buçuk guruşa müvekkil-i merkūm Derviş el-Hâc Mehmed’e bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i mübeyyen iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin altmış iki buçuk guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup doksan sehmi mukaddemâ ve otuz sehmi hâlâ şirâen ki mecmû‘-i âlât-ı lâzıme-i mezkûre müvekkil-i merkūm Derviş el-Hâc Mehmed’in mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 11 M sene [1]238. Şühûdü’l-hâl: Kethudâ Mustafa Ağa b. Halil, Kastamonulu es-Seyyid el-Hâc Veliyüddin Ağa b. Mehmed, Uzun Mehmed Ağa b. Hasan, es-Seyyid el-Hâc Yusuf Ağa b. Süleyman, İbrahim Yazıcı b. Mustafa.