İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 103 Hüküm no: 61 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lazari v. Aslan’ın mâlik olduğu bakkal dükkânını Tanaş v. Tagodos’a sattığı Bakkāl Mahmiye-i İstanbul’da kâin bakkāl esnâfından Lazari v. Aslan nâm zimmî tarafından husûs-ı âti’l-beyânı ikrâr ve i‘tâ-i hüccete vekîl olduğu Estat v. Estavri ve Aleksi v. Mesayil nâm zimmîler şehâdetleriyle ber-nehc-i şer‘î sâbit olan İlya v. Estavri nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden bâ‘is-i hâzihi’r-rakīm Tanaş v. Tagodos nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkil-i mesfûr Lazari zimmî mahmiye-i mahkiyede Ayasofya-i kebîr kurbünde vâki‘ Ali Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle kırk sehm hisse-i şâyi‘ası bundan akdem hâlik olan Banayat zimmî veresesinin ve kırk sehm hisse-i şâyi‘ası Agosti nâm zimmînin ve mâ‘adâ kırk sehm hisse-i şâyi‘ası akd-i âti’z-zikrin sudûruna değin benim yedimizde [13b] bâ-hüccet-i şer‘iye iştirâken mâlımız ve mülkümüz olmağla ben âlât-ı lâzıme-i ma‘lûme-i merkūmeden ber-i‘tibâr-ı mezkûr mâlik olduğum kırk sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîklerim izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mersûm Tanaş zimmîye bin beş yüz seksen üç guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz seksen üç guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan kırk sehm hisse-i şâyi‘ada benim kat‘a alâka ve medhalim kalmayup mersûm Tanaş zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 M sene [12]38. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Kābız-ı mâl Simyon, Yazıcı Eftat, Çakıroğlu Yorgi, diğer Yorgi.