İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 104 Hüküm no: 62 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. Estefan v. Atam’ın mâlik olduğu bakkal dükkânını Aslan v. Abraham’a sattığı Balık Pazarı hâricinde bakkāl Mahmiye-i İstanbul’da kâin bakkāl esnâfından Yuvan v. Estefan v. Atam nâm zimmî tarafından husûs-ı âtiyyü’l-beyânı ikrâr ve i‘tâ-i hüccete vekîl olduğu Kābız-ı mâl Simyon v. Todori ve Antemos v. Yuvakim nâm zimmîler şehâdetleriyle ber-nehc-i şer‘î sâbit olan Todori v. Nikola nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden işbu hâmilü’r-rakīm Aslan v. Abraham nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkil-i mesfûr Yuvan zimmî mahmiye-i İstanbul hısnı ebvâbından Balık Pazarı Kapısı hâricinde Peynirciler sûkunda vâki‘ el-Hâc Alemdar dükkânı demekle arîf ma‘lûmü’l-hudûd bir bâb ve yine dükkân-ı mezkûr karşısında kâin Karakelle dükkânı demekle ma‘rûf kezâlik ma‘lûmü’l-hudûd bir bâb ki cem‘an iki bâb bakkāl dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerinin her biri yüz yirmişer sehm i‘tibâriyle her birinden yüz beş sehmi âharların ve mâ‘adâ on beş sehmi akd-i âti’z-zikrin sudûruna değin bâ-hüccet-i şer‘iye benim yedimde mâlım ve mülküm olmağla ben âlât-ı lâzıme-i mezkûrelerin her birinden ber-i‘tibâr-ı merkūm mâlik olduğum on beşer sehm hisse-i şâyi‘a-i mezkûrelerimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i âharlarım izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle üç bin guruşa mersûm Aslan zimmîye bey‘ ve temlik ve vech-i lâyıkı üzere her birini teslîm eylediğimde ol dahi ber-vech-i meşrûh iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikirleri mürûr eden el-Hâc Alemdar ve Karakelle dükkânları derûnlarında mevcûde gedik ta‘bîr olunan âlât-ı lâzıme-i ma‘lûmelerin her birinden i‘tibâr-ı mezkûr üzere on beşer sehm hisse-i şâyi‘a-i mezkûrelerinde benim kat‘a alâka ve medhalim kalmayup mersûm Aslan zimmînin emvâl-i müşterâtı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 M sene [1]238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Yazıcı Eftat, Düğenci Çakıroğlu Yorgi, Şişman Lefter, Mihal, Yuvan, Lazari.