İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 106 Hüküm no: 65 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Abdullah’ın Mehmed Tahir Ağa b. Süleyman’ın yerine çubukçu esnafı kethudalığına tayini Çubukçu esnâfının kethudâ ve ustabaşı nasbları Mahmiye-i İstanbul’da kâin çubukçu esnâfının Yiğitbaşıları es-Seyyid Hafız Ahmed b. Abdullah ve Yazıcıları es-Seyyid İbrahim b. es-Seyyid Osman ve esnâfından kethudâ-i esbak Uzun Süleyman Ağa ve İbrahim Paşalı Mustafa Ağa ve Alacahamamlı İbrahim Ağa ve Yapmacı Mustafa Ağa ve es-Seyyid Ahmed Ağa ve sâir Müslimîn ile re‘âyâdan Baklacıoğlu Kirkor ve Yoseb ve diğer Yoseb ve Badesar ve Serab zimmîler ve Avram Yahûdî ve sâirleri hâlâ Zehgîrcibaşı el-Hâc Mehmed Ağa b. Abdullah ve Uzunçarşı Kethudâsı Mehmed Ağa b. Mehmed Salih ve Yiğitbaşı Hafız Hüseyin b. Mehmed ve Yazıcısı Mustafa Efendi b. el-Hâc Hafız Mehmed Emin hâzır oldukları hâlde sâbıkā çubukçular kethudâsı işbu bâ‘isü’l-kitâb Ali Ağa b. Abdullah mahzarında esnâf-ı mezkûreden Ayasofyalı Ahmed Ağa ve Mahmudpaşalı Abdullah Usta ve Börekçi es-Seyyid Mehmed Ağa ve Ayasofyalı Mehmed Ârif Ağa ve Yenicâmi’li Paşa Hüseyin Ağa ve Vezirhanlı Kadri Ağa nâm Müslimîn ile re‘âyâdan Alyanakoğlu Kirkor zimmî ve Mişon Yahûdî kezâlik hâzır oldukları hâlde her biri takrîr-i kelâm ve ta‘bîr ani’l-merâm edip bir müddetden beri kethudâmız olan gāib ani’l-meclis Mehmed Tâhir Ağa b. el-Hâc Süleyman nâm kimesne esnâfımızın umûrunu idâre ve rü’yetden izhâr-ı acz birle keff-i yed edip ol-vechile yerine esnâfımız üzerine bir kethudâ nasbı lâzım ve mühim olmağın cümlemizin merzî ve muhtârımız ve örf ve âdetimize vâkıf ve nizâmımızı arîf ve her vechile kethudâlık umûrunu rü’yete kādir mezbûr Ali Ağa yine esnâfımız üzerine merkūm Mehmed Tâhir Ağa’nın yerine kethudâ nasb buyrulup hâzırın-ı merkūmûn Ahmed Ağa ve Abdullah Usta ve es-Seyyid Mehmed Ağa ve Mehmed Ârif Ağa ve Kadri Ağa nâm Müslimîn ile mesfûr Alyanakoğlu Kirkor zimmî ve mersûm Mişon Yahûdî ile gāibûn ani’l-meclis Vezirhanlı Melkon ve Aci Kalos nâm zimmîler ve Şişman Menteş nâm Yahûdî dahi ustabaşılar ta‘yîn buyrulmak cümlemizin matlûbumuzdur dediklerinde hâkim-i muvakkı‘-ı sadr-ı kitâb -rafe‘a kadrahû mevlâhu’l-Vehhâb- efendi hazretleri dahi mezbûr Ali Ağa’yı esnâf-ı merkūme üzerine kethudâ ve hâzırûn-ı merkūmûn ile gāibûn-ı mersûmûndan her birini ustabaşı nasb ü ta‘yîn ve umûr-ı esnâfı bi’l-ma‘iye ittifâk ve ittihâd ile idâre ve rü’yet edip hilâf-ı şer‘-i şerîf ve mugāyir-i nizâm esnâfdan bir ferde te‘addî ve rencîde etmemek üzere her birine emr ü tenbîh buyurduklarında mezbûr Ali Ağa ve hâzırûn-ı merkūmundan her biri kabûl ve ber-mûceb-i emr ü tenbîh harekete ta‘ahhüd etmeğin mâ-vaka‘a [bi’t-taleb ketb olundu.] Fî 9 M sene [1]238. Şühûdü’l-hâl: Kethudâ-i muhzırân İsmail Ağa, Molla Hüseyin el-Muhzır, Molla Halil el-Muhzır.