İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 106 Hüküm no: 64 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav esnafından Seyyid İbrahim b. Mehmed’in mâlik olduğu manav dükkânını Mustafa Beşe b. Ömer’e sattığı Kapan-ı dakīk hâricinde manav Mahmiye-i İstanbul’da kâin manav esnâfından es-Seyyid İbrahim b. Mehmed nâm kimesne meclis-i şer‘-i şerîf-i enverde şerîki işbu bâ‘isü’l-kitâb Mustafa Beşe b. Ömer nâm kimesne mahzarında ikrâr-ı tam ve takrîr-i kelâm edip mahmiye-i mahkiyede Kapan-ı dakīk kapısı hâricinde ma‘lûmü’l-hudûd bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz altmış sehm i‘tibâriyle yirmi bir sehmi Saide Hanım’ın ve on yedi sehmi Mehmed Tâhir nâm sagīrin ve mâ‘adâ yüz yirmi iki sehmi akd-i âti’z-zikrin sudûruna değin bâ-hüccet-i şer‘iye benim yedimizde iştirâken mâlımız ve mülkümüz olmağla ben âlât-ı lâzıme-i merkūmeden ber-i‘tibâr-ı mezkûr mâlik olduğum yüz yirmi iki sehm hisse-i şâyi‘amın altmış bir sehmini yedimde ibkā mâ‘adâ altmış bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleriyle şerîkim mezbûr Mustafa Beşe’ye yedi yüz elli guruşa bey‘ ü temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm yedi yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan altmış bir sehm hisse-i şâyi‘ada benim kat‘a alâka ve medhalim kalmayup şerîkim mezbûr Mustafa Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 M sene [1]238. Şühûdü’l-hâl: Pazarbaşı es-Seyyid İbrahim [b.] Sârım Bey, Musa Yazıcı, Muhzır Molla Çelebi.