İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 108 Hüküm no: 67 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Çubukçu esnafından Mahmud Ağa b. İsmail’in mâlik olduğu kiras çubuklarını Ali Ağa b. Abdullah ile Yiğitbaşı Hasan Ağa’ya sattığı
Çubuk mübâya‘ası
Mahmiye-i İstanbul’da kâin çubukçu esnâfından Mahmud Ağa b. İsmail nâm kimesne meclis-i şer‘-i şerîf-i enverde esnâf-ı mezkûre kethudâsı işbu bâ‘isü’l-kitâb Ali Ağa b. Abdullah ile Yiğitbaşı Hasan Ağa ve Yazıcı Ahmed Ağa mahzarlarında esnâf-ı merkūmenin bâ-hüccet-i şer‘iye ma‘lûmü’l-esâmî ustabaşıları olan Müslimîn ve re‘âyâ hâzır oldukları hâlde bi’t-tav‘ ve’r-rızâ ikrâr-ı tam ve takrîr-i kelâm edip taşra ve memleketlerinden Âsitâne-i aliyye’ye vürûd eden kiras çubuklarını dâimâ kethudâ ve yiğitbaşı ve yazıcı olanlar esnâfımızın ihtiyârları re’y ve ma‘rifetleriyle tüccârından bahâsını kat‘ birle iştirâ ve bi’l-cümle esnâfa tevzî‘ ve taksîm ve semenlerini tahsîl ve tüccâra edâ etmek ve esnâfımızdan bir kimesne hufyeten ve münferiden tüccâr yedinden gerek kalîl ve gerek kesîr çubuk iştirâ etmemek nizâm-ı kadîmimizden olup ol-vechile te‘âmül olunur iken ben mugāyir-i nizâm tüccârı yedinden bundan akdem kimesneye ifâde etmeyerek müstakıllen iştirâ ve kabz eylediğim beş bin altı yüz on üç aded kiras çubuklarını ber-vech-i muharrer yedimde mâlım iken nizâmımıza mugāyir hareket eylediğime nâdim ve pişman olmamla zikr olunan beş bin altı yüz on aded kiras çubuklarını safka-i vâhide ile tarafeynden bi’l-îcâb ve’l-kabûl bâtten ve sahîhan her bir adedini birer guruşdan cem‘an beş bin altı yüz on üç guruşa esnâf-ı merkūmeye tevzî‘ ve taksîm içün bi’l-cümle ustabaşılarımız hâzırûn-ı mezbûrûnun re’y ve ma‘rifetleriyle kethudâ ve yiğitbaşı ve yazıcı-i merkūmûna bi-tarîki’l-bey‘ def‘ ü teslîm eylediğimde onlar dahi iştirâ ve kabz ve esnâfa tevzî‘ ve taksîm ve semen-i merkūm beş bin altı yüz on üç guruşu bana tamamen def‘ ü teslîm eylediklerinde ben dahi yedlerinden tamamen ahz ü kabz etmemle fîmâ-ba‘d zikr olunan çubuklarda benim kat‘a alâkam kalmayup meblağ-ı merkūmdan dahi mezbûrûnun zimmetlerinde bir akçe hakkım kalmadı dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.]
Fî 20 M sene [1]238.
Şühûdü’l-hâl: Molla Hüseyin b. Yusuf el-Muhzır, Molla Mahmud b. Mahmud el-Muhzır, Molla Halil el-Muhzır.
|