İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 109 Hüküm no: 68 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber esnafından Seyyid Mustafa Usta b. Seyyid Sadullah’ın mâlik olduğu berber dükkânını Mehmed Emin Ağa b. Mehmed Emin’e sattığı Berber gediği Mahmiye-i İstanbul’da kâin berber esnâfından es-Seyyid Mustafa Usta b. es-Seyyid Sadullah nâm kimesne meclis-i şer‘-i şerîf-i enverde zikri âtî bir bâb dükkânın bi’l-icâreteyn mutasarrıfı işbu bâ‘isü’l-kitâb Mehmed Emin Ağa b. Mehmed Emin nâm kimesne mahzarında ikrâr-ı tam ve takrîr-i kelâm edip mahmiye-i mahkiyede Hâcekadın Hamamı kurbünde Hızır Bey mahallesinde vâki‘ bir tarafdan sebzevâtçı dükkânı ve bir tarafdan merkūm Mehmed Emin Ağa’nın mutasarrıf olduğu attâr dükkânı beynlerinde kâin bir bâb dükkân merkūm Mehmed Emin Ağa’nın bi’l-icâreteyn taht-ı tasarrufunda ve derûnunda mevcûde beyne’l-esnâf berber gediği ta‘bîr olunur ber-mûceb-i defter-i müfredât âlât-ı lâzıme-i ma‘lûme işbu yedimde olan bir kıt‘a sûret mûcebince akd-i âti’z-zikrin sudûruna değin müstakıllen benim yedimde mâlım ve mülküm olmağla ben ber-minvâl-i muharrer mâlik olduğum âlât-ı lâzıme-i ma‘lûmenin nısfını yedimde ibkā ve mâ‘adâ nısf hisse-i şâyi‘asını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Mehmed Emin Ağa’ya iki bin guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm eylediğinde ben dahi yedinden tamamen ahz ü kabz edip [15a] mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan nısf-ı âlât-ı lâzıme-i ma‘lûmede benim kat‘a alâka ve medhalim kalmayup merkūm Mehmed Emin Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 20 M sene [1]238. Şühûdü’l-hâl: Kethudâ vekîli İbrahim Ağa, Şeyh Halil Efendi, Du‘âcı el-Hâc Abdullah, Yiğitbaşı Nuri, Çavuş Mustafa Usta.