İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 111 Hüküm no: 70 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Anton v. Abdalah’ın mâlik olduğu sandalcı destgâhını Yoseb v. Anton’a sattığı Sandalcı Hudâvendigâr-ı esbak merhûm cennet-mekân firdevs-âşiyân Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Anton v. Abdalah nâm zimmî meclis-i şer‘-i hatîr-i lâzımü’t-tevkīrde esnâf-ı mezkûre mülâzım kalfalarından işbu hâmilü’r-rakīm Yoseb v. diğer Anton nâm zimmî muvâcehesinde ikrâr-ı tam ve takrîr-i kelâm edip bâlâda zikr ve beyân olunan destgâhlardan akd-i âti’z-zikrin sudûruna değin yedimde bâ-hüccet mâlım olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Yoseb zimmîye iki yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz u kabûl ve semeni olan meblağ-ı merkūm iki yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup mersûm Yoseb zimmînin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 M sene [1]238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Yiğitbaşı es-Seyyid Mehmed Emin Ağa, Yiğitbaşı Ebûbekir Ağa b. Ali.