İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 110 Hüküm no: 69 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Usta b. Mustafa’nın Şeyh Halil Efendi b. Mustafa’nın yerine berberler şeyhliğine tayini Berberler şeyhliği nasbı Âsitâne-i aliyye -sânahallâhu te‘âlâ ani’l-âfât ve’l-beliyye-’de kâin berber esnâfının bâ-berât-ı şerîf-i âlî-şân şeyhleri olan Mustafa Efendi b. Hüseyin nâm kimesne meclis-i şer‘-i hatîr-i lâzımü’t-tevkīrde esnâf-ı mezkûrenin kethudâları İbrahim Ağa ve Du‘âcı Abdullah Efendi ve Yiğitbaşı es-Seyyid Mehmed Nuri Ağa ve sâir mazbûtü’l-esâmî kimesneler hâzır oldukları hâlde yine esnâf-ı mezkûreden işbu bâ‘isü’l-kitâb el-Hâc Musa Usta b. Mustafa nâm kimesne mahzarında takrîr-i kelâm ve ta‘bîr ani’l-merâm edip bâ-berât-ı şerîf-i âlî-şân mutasarrıf olduğum esnâf-ı mezkûre şeyhliği umûrunu idâre ve rü’yete tarafımdan bâ-hüccet-i şer‘iye vekîlim olan eş-Şeyh Halil Efendi b. Mustafa esnâf-ı mezkûre şeyhliği umûrunu rü’yetden ızhâr-ı acz edip istifâ eylediğine binâen vekâlet-i merkūmeden mezbûru azletmemle vekîl-i ma‘zûl-i mezbûrun yerine sadâkāt ve istikāmet ile ma‘rûf ve diyânet ile mevsûf ve her vechile şeyhlik vekâleti umûrunu idâre ve rü’yete kādir ve bi’l-cümle esnâf-ı mezkûrenin merzî ve muhtârları olan merkūm el-Hâc Musa Usta’yı esnâf-ı merkūmenin şeyhliği umûrunu rü’yete cümlesinin taleb ve iltimâslarıyla tarafımdan vekîl-i nâib-i menâb nasb ü ta‘yîn eyledim dedikde ol dahi vekâlet-i merkūmeyi kabûl ve hizmet-i lâzımesini kemâ-yenbagī bi’l-vekâle idâre ve rü’yete ta‘ahhüd etmeğin mâ-vaka‘a [bi’’t-taleb ketb olundu.] Fî 21 M sene [1]238. Şühûdü’l-hâl: Kethudâ-i muhzırân İsmail Ağa, Molla Hüseyin el-Muhzır, Molla Halil el-Muhzır.