İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 113 Hüküm no: 73 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Apostol v. Anton’un mâlik olduğu bakkal dükkânını Todori v. Anton’a sattığı Bakkāl Mahmiye-i İstanbul’da kâin bakkāl esnâfından Apostol v. Anton nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden işbu hâmilü’r-rakīm Todori v. Anton nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede eski Darbhâne fırını ittisâlinde kâin Hacı Yusuf Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ altmış sehm hisse-i şâyi‘ası akd-i âti’z-zikrin sudûruna değin benim yedimde mâlım ve mülküm iken zikr olunan altmış sehm hisse-i şâyi‘amın otuz sehmini diğer bir kıt‘a hüccet-i şer‘iye ile âhara bey‘ etmemle bâkī otuz sehm hisse-i şâyi‘amı dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mersûm Todori zimmîye dokuz yüz yirmi beş guruşa bey‘ ü temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm dokuz yüz yirmi beş guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i ma‘lûmede benim kat‘a alâka ve medhalim kalmayup otuz sehm hisse-i şâyi‘a-i mezkûre mersûm Todori zimmînin [16a] mâl-ı müşterâsı ve hakk-ı sırfı olmuşdur dedikde gıbbe’t-tasdîki [‘ş-şer‘î mâ-vaka‘a bi’t-taleb ketb olundu.] Fî 25 M sene [1]238. Şühûdü’l-hâl: Pazarbaşı Süleyman Ağa, Bölükbaşı ( ), Kâtib Ahmed Efendi.