İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 114 Hüküm no: 74 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derzi Yoseb v. Artin’in mâlik olduğu un değirmeninin vârisleri tarafından Seyyid Ömer Ağa b. Seyyid Mehmed’e satıldığı Uncu değirmeni mübâya‘ası Mahrûse-i Galata hâricinde vâki‘ saray-ı behişt-âsâ-yı Sultanî civârında kâin Yenimahalle’de mütemekkin iken bundan akdem hâlik olan Derzi Yoseb v. Artin nâm zimmînin verâseti zevce-i metrûkesi Maryem bt. Mikâil nâm Nasrâniye ile sulbiye kebîre kızları Şirazne ve Harospima Nasrâniyeler ve sulbî kebîr oğulları Haçador ve Revandon ve Mikâil zimmîlere münhasıra ve tashîh-i mesele-i mîrâsları altmış dört sehmden olup sihâm-ı mezbûrenin sekiz sehmi zevcesi mersûme Maryem Nasrâniyeye ve yedişer sehmi kızları mersûmetân Şirazne ve Harospima Nasrâniyelerden her birine ve on dörder sehmi oğulları mesfûrûn Haçador ve Anton ve Mikâil zimmîlere isâbeti tahakkukundan sonra mersûmât Maryem ve Şirazne ve Harospima Nasrâniyeler taraflarından husûs-ı âtiyyü’l-beyânda vekîlleri olduğu ma‘rifet-i şer‘iye ile şahıslarını ârifân es-Seyyid Mustafa Ağa b. el-Hâc Mehmed Emin ve el-Hâc Mehmed Ağa b. el-Hâc İbrahim nâm kimesneler şehâdetleriyle ber-nehc-i şer‘î sâbit olan mesfûr Haçador zimmî ile mesfûrân Anton ve Mikâil zimmîler meclis-i şer‘-i hatîr-i lâzımü’t-tevkīrde mahmiye-i İstanbul ve bilâd-ı selâsede kâin uncu esnâfından işbu bâ‘isü’l-kitâb es-Seyyid Ömer Ağa b. es-Seyyid Mehmed nâm kimesne mahzarında her biri bi’l-vekâle ve bi’l-verâse ikrâr-ı tam ve takrîr-i kelâm edip mahmiye-i mezbûrede Unkapanı dâhilinde vâki‘ Çarh-ı felek değirmeni demekle ma‘rûf beş horoslu ma‘lûmü’l-hudûd bir bâb uncu değirmeninden müfrez ma‘lûmü’l-hudûd iki horoslu müstakıllen bir bâb uncu değirmeni derûnunda mevcûde sekiz re’s bârgir i‘tibâriyle beyne’l-esnâf gedik ta‘bîr olunur âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûmesi mezbûr es-Seyyid Ömer Ağa’nın ve mâ‘adâ dört re’s bârgir ve onlara isâbet eden sâir âlât-ı lâzıme-i ma‘lûmesi mûrisimiz babamız hâlik-i mesfûr Derzi Yoseb zimmînin ile’l-helâk yedinde mâlı ve mülkü olup ba‘de helâkihî ber-tashîh-i merkūm müvekkilât-ı mesfûrât ile bize mevrûs olmağın biz ve müvekkilât-ı mesfûrât âlât-ı lâzıme-i ma‘lûme-i mezkûreden akd-i âti’z-zikrin sudûruna değin ber-vech-i muharrer irsen mâlikleri olduğumuz dört re’s bârgir ve onlara isâbet eden sâir âlât-ı lâzıme-i ma‘lûmesi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Ömer Ağa’ya beş bin iki yüz guruşa her birimiz bi’l-vekâle ve bi’l-asâle bey‘ ve temlik ve vech-i lâyıkı üzere teslîm eylediğimizde ol dahi ber-minvâl-i muharrer yedimizden iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin iki yüz guruşu bize def‘ ü teslîm eylediğinde biz dahi yedinden asâleten ve vekâleten tamamen ve kâmilen ahz ü kabz ve ber-tashîh-i merkūm beynimizde iktisâm edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan Çarh-ı felek değirmeninden müfrez iki horoslu bir bâb uncu değirmeni derûnunda mevcûde sâlifü’z-zikr gedik ta‘bîr olunur âlât-ı lâzıme-i ma‘lûmede bizim ve müvekkilât-ı mesfûrâtın kat‘a alâka ve medhalimiz kalmayup dört re’s bârgir ve onlara isâbet eden sâir âlât-ı lâzıme-i ma‘lûme mukaddemâ ve mâ‘adâ dört re’s bârgir ve onlara isâbet eden sâir âlât-ı lâzıme-i ma‘lûme hâlâ ber-minvâl-i muharrer şirâen ki mecmû‘u merkūm es-Seyyid Ömer Ağa’nın mâlı ve mülkü ve hakk-ı sırfı olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 M sene 1238. Şühûdü’l-hâl: Ekmekçiler Kethudâsı Mehmed Efendi b. Ali, Uncular Kethudâsı el-Hâc Mehmed Ağa, es-Seyyid Mustafa Ağa.