İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 119 Hüküm no: 80 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu esnafından İstefan v. Haçador’a sahip olduğu kuyumcu dükkânı gediği için hüccet verilmesi Kuyumcu gediği ihbârı Mahmiye-i İstanbul’da kâin kuyumcu esnâfından işbu hâmilü’r-rakīm İstefan v. Haçador nâm zimmî meclis-i şer‘-i hatîr-i lâzımü’t-tevkīrde mahmiye-i mezbûrede âyîneceler sûkunda kâin Kalıcılar Hanı demekle ma‘rûf kârgîr hanın taşra kapısının fevkınde tabaka-i ulyâ vasatında bir bâb kapı içinde vâki‘ beş bâb odalara bâ-temessük-i mütevellî bi’l-icâreteyn mutasarrıflar olan es-Seyyid Mehmed Efendi b. es-Seyyid Halil ile karındaşı sagīr es-Seyyid Mehmed Emin’in hâli ve tesviye-i umûruna bâ-hüccet vasî-i mansûbu Ahmed Azmi Efendi b. Mehmed ve Hancı es-Seyyid el-Hâc Mehmed Emin Ağa ve kuyumcu esnâfının kethudâları Ali Ağa ve nâzırları Agop ve Serope ve Saraylı Artin zimmîler hâzır oldukları hâlde takrîr-i kelâm ve ta‘bîr ani’l-merâm edip zikr olunan odalardan cânib-i yemînden addolundukda ikinci bir bâb odanın mukaddemâ bi’l-icâreteyn mutasarrıfı olan hâzır-ı mezbûr es-Seyyid Mehmed Efendi ve sagīr-i mezbûr es-Seyyid Mehmed Emin’in babaları müteveffâ es-Seyyid Halil Efendi’nin hayatında i‘tâ eylediği işbu yedimde olan bin iki yüz on beş senesi Şa‘bâni’l-mu‘azzamı gurresi târihiyle müverrah bir kıt‘a temessük mantûkunca şehriye altı guruş kirâ ile ben ve li-ebeveyn karındaşım gāib ani’l-meclis Andon zimmî müsteciri ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme dahi yine karındaşım mersûm ile ale’l-iştirâk mâlımız ve mülkümüz olmağın lâkin mârrü’l-beyân âlât-ı lâzıme-i ma‘lûme ber-vech-i mübeyyen mülkümüz olduğunu müş‘ir temessük-i merkūmdan mâ‘adâ sened-i şer‘î olmamağla hâzırân-ı mezbûrândan suâl ve esnâf-ı hâzırûn-ı merkūmundan istihbâr olunup hâzırân-ı merkūmânın rızâ ve tasdîkleriyle sened olmak üzere kıbel-i şer‘den yedimize bir kıt‘a hüccet i‘tâ olunmak matlûbumdur dedikde hâzırân-ı mezbûrân es-Seyyid Mehmed Efendi ve Ahmed Azmi Efendi’den her biri ba‘de’t-tasdîk esnâf-ı hâzırûn-ı merkūmun dahi haber vermeleriyle hıfzen li’l-makāl mâ-vaka‘a [bi’t-taleb ketb olundu.] Fî-selh-i M sene [1]238. Şühûdü’l-hâl: Muhzır Molla Halil, Muhzır Molla Hüseyin, Muhzır Molla Mahmud.