İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 120 Hüküm no: 81 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurumluoğlu Seyyid Mustafa Ağa b. Seyyid Mehmed’in alacaklarının tahsili için Hüseyin Ağa b. Hüseyin’i vekil tayin ettiği Vekâlet Mahrûse-i Burusa ahâlisinden Erzurumluoğlu es-Seyyid Mustafa Ağa b. es-Seyyid el-Hâc Mehmed b. Ali nâm kimesne mahmiye-i İstanbul’da meclis-i şer‘-i hatîr-i lâzımü’t-tevkīrde dergâh-ı âlî -dâme mahfûfen bi’l-me‘âlî- yeniçerilerinin birinci bölük odası mütevellîsi işbu bâ‘isü’l-kitâb Hüseyin Ağa b. Hüseyin mahzarında ikrâr-ı tam ve takrîr-i kelâm edip işbu târih-i kitâb şehrinin beşinci günü ile müverrah bir kıt‘a i‘lâm-ı şer‘î mûcebince gāib ani’l-meclis Haffâf Kirkor v. Avanes zimmî zimmetinde benim ve bâ-hüccet-i şer‘iye vasîsi olduğum li-ebeveyn kız karındaşım sagīre Şerîfe Fatıma’nın mahkûmun-bih alacak hakkımız olan on bin üç yüz altmışaltı guruş ile şehr-i merkūmun yirmi yedinci günü ile müverrah diğer bir kıt‘a i‘lâm-ı şer‘î mantûkunca mesfûr Kirkor zimmînin karındaşı kezâlik gāib ani’l-meclis Avanes v. el-mersûm Bedros zimmî zimmetinde bedel-i sulh-ı sahîhden müeccelen müstakıllen benim alacak hakkım olan iki bin beş yüz guruşu mesfûrândan lede’t-tahsîl ahz ü kabz ve bana irsâl ve îsâl ve teslîme bi’l-asâle ve bi’l-vesâye tarafımdan merkūm Hüseyin Ağa’yı vekîl ve nâib-i menâb nasb ü ta‘yîn eylediğimde ol dahi vekâlet-i merkūmeyi kabûl ve hizmet-i lâzımesini kemâ-yenbagī edâya ta‘ahhüd ve iltizâm eyledi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i Za sene [1]238. Şühûdü’l-hâl: İbrahim Efendi, Mehmed Ağa, Muhzır Molla Halil.