İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 121 Hüküm no: 83 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Alyanakoğlu Ohannes v. Agop’un mâlik olduğu kuyumcu dükkânı için vârislerine hüccet verilmesi Kalıcılar Hân’ında oda aded 5 İhrâc şüd fî 25 Ca sene [12]54. Mahrûse-i Galata’da Sultan Bâyezid mahallesinde mütemekkin iken bundan akdem hâlik olan Kuyumcu Alyanakoğlu Ohannes v. Agop nâm zimmînin verâseti zevce-i metrûkesi Maryem bt. Ohannes Nasrâniye ile sulbiye-i kebîre kızı Derohi ve sulbiye sagīre kızı Deronika ve sulbî sagīr oğulları Repayil ve Komidas ve Kirkor ve Karabet’e inhisârı tahakkukundan sonra mesfûretân Maryem ve Derohi Nasrâniyeler taraflarından husûs-ı âti’l-beyânda vekîl-i sâbitü’l-vekâleleri ve sıgār-ı mersûmûnun tesviye-i umûrlarına bâ-hüccet-i şer‘iye vasî-i mansûbeleri işbu hâmilü’r-rakīm Agosti v. Petrak nâm zimmî meclis-i şer‘-i hatîr-i lâzımü’t-tevkīrde mahmiye-i mezbûrede âyîneceler sûkunda kâin Kalıcılar Hanı demekle ma‘rûf kârgîr hanın taşra kapısının fevkınde tabaka-i ulyâ vasatında bir bâb kapı içinde vâki‘ beş bâb odalara bâ-temessük-i mütevellî bi’l-icâreteyn mutasarrıflar olan es-Seyyid Mehmed Efendi b. es-Seyyid Halil ile karındaşı sagīr es-Seyyid Mehmed Emin’in hâli ve tesviye-i umûruna bâ-hüccet-i şer‘iye vasî-i mansûbu Ahmed Azmi Efendi b. Mehmed ve Hancı es-Seyyid el-Hâc Mehmed Emin Ağa ve kuyumcu esnâfının kethudâsı Ali Ağa ve nâzırları Agop ve Serope ve Saraylı Artin zimmîler hâzır oldukları hâlde bi’l-vekâle ve bi’l-asâle takrîr-i kelâm ve ta‘bîr ani’l-merâm edip zikr olunan odalardan cânib-i yemînden addolundukda dördüncü bir bâb odanın mukaddemâ bi’l-icâreteyn mutasarrıfı olan hâzır-ı mezbûr es-Seyyid Mehmed Efendi ve sagīr-i mezbûr es-Seyyid Mehmed Emin’in babaları müteveffâ es-Seyyid Halil Efendi’nin hayatında i‘tâ eylediği işbu yedimde olan bin iki yüz on beş senesi Şa‘bâni’l-mu‘azzamı gurresi târihiyle müverrah bir kıt‘a temessük mantûkunca şehriye altı guruş kirâ ile hâlik-i mesfûr Alyanak Ohannes zimmî müsteciri ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmesi yine hâlik-i mesfûrun ile’l-helâk yedinde mâlı ve mülkü olup ba‘de helâkihî müvekkilelerim mersûmetân ile vasîleri olduğum [18b] sıgār-ı mesfûrun[a] mevrûs olup zikr olunan odayı hâzır-ı mezbûr es-Seyyid Mehmed Efendi ve hâzır-ı merkūm Ahmed Azmi Efendi kemâ-fi’s-sâbık kirâ-i kadîmi olan şehriye altı guruşa hâlik-i mersûmun veresesi mesfûrundan her birine îcâr etmiş olduklarında onlar dahi istîcâr ve kabûl edip lâkin zikr olunan gedik ta‘bîr olunur âlât-ı lâzıme-i ma‘lûme ber-vech-i muharrer verese-i mersûmûndan her birinin mâl-ı mevrûsları olduğunu müş‘ir temessük-i merkūmdan mâ‘adâ sened-i şer‘î olmamağla merkūmândan suâl ve esnâf-ı hâzırûn-ı merkūmûndan istihbâr olunup merkūmânın rızâ ve tasdîkleri ile sened olmak üzere kıbel-i şer‘den yedlerine bir kıt‘a hüccet i‘tâ olunmak bi’l-vekâle ve bi’l-vesâye matlûbumdur dedikde hâzırân-ı mezbûrân es-Seyyid Mehmed Efendi ve Ahmed Azmi Efendi’den her biri ba‘de’t-tasdîk esnâf-ı hâzırûn-ı merkūmûn dahi haber vermeleriyle hıfzen li’l-makāl mâ-vaka‘a [bi’t-taleb ketb olundu.] Fî-selh-i M sene [1]238. Şühûdü’l-hâl: Molla Halil el-Muhzır, Molla Hüseyin el-Muhzır, Molla Mahmud el-Muhzır.