İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 123 Hüküm no: 84 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Hucasar v. Kigork’un mâlik olduğu kuyumcu dükkânı için vârislerine hüccet verilmesi Üçüncü odanın kuyumcu gediği ihbârı Mahmiye-i İstanbul’da kâin kuyumcu esnâfından olup bundan akdem hâlik olan Hucasar v. Kigork nâm zimmînin verâseti zevce-i metrûkesi Derohi bt. Abraham Nasrâniye ile sulbiye-i kebîre kızları Aranohi ve Gülgili Nasrâniyeler ve sulbî kebîr oğlu Sâ‘atçi Nişan zimmîye inhisârı tahakkukundan sonra mesfûrât Derohi ve Aranohi ve Gülgili Nasrâniyeler taraflarından husûs-ı âti’l-beyânda vekîl-i sâbitü’l-vekâleleri işbu hâmilü’r-rakīm mesfûr Sâ‘atçi Nişan zimmî meclis-i şer‘-i hatîr-i lâzımü’t-tevkīrde mahmiye-i mezbûrede âyîneceler sûkunda kâin Kalıcılar Hanı demekle ma‘rûf kârgîr hanın taşra kapısının fevkınde tabaka-i ulyâ vasatında bir bâb kapı içinde vâki‘ beş bâb odalara bâ-temessük-i mütevellî bi’l-icâreteyn mutasarrıflar olan es-Seyyid Mehmed Efendi b. es-Seyyid Halil ile karındaşı sagīr es-Seyyid Mehmed Emin’in hâli ve tesviye-i umûruna bâ-hüccet-i şer‘iye vasî-i mansûbu Ahmed Azmi Efendi b. Mehmed ve Hancı es-Seyyid el-Hâc Mehmed Emin Ağa ve kuyumcu esnâfının kethudâsı Ali Ağa ve nâzırları Agop ve Serope ve Saraylı Artin zimmîler hâzır oldukları hâlde bi’l-asâle ve bi’l-vekâle takrîr-i kelâm ve ta‘bîr ani’l-merâm edip zikr olunan odalardan cânib-i yemînden addolundukda üçüncü bir bâb odanın mukaddemâ bi’l-icâreteyn mutasarrıfı olan hâzır-ı mezbûr es-Seyyid Mehmed Efendi ve sagīr-i mezbûr es-Seyyid Mehmed Emin’in babaları müteveffâ es-Seyyid Halil Efendi’nin hayatında i‘tâ eylediği işbu yedimde olan bin iki yüz on beş senesi Şa‘bâni’l-mu‘azzamı gurresi târihiyle müverrah bir kıt‘a temessük mantûkunca şehriye altı guruş kirâ ile babam hâlik-i mesfûr Kuyumcu Hucasar zimmî müsteciri ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmesi yine babam hâlik-i mesfûrun ile’l-helâk yedinde mâlı ve mülkü olup zevcesi anam mersûme Derohi ve kız karındaşlarım mesfûretân Aranohi ve Kelkeli Nasrâniyelere ve bana mevrûs olup zikr olunan odayı hâzır-ı mezbûr es-Seyyid Mehmed Efendi ve hâzır-ı mezbûr Ahmed Azmi Efendi kemâ-fi’s-sâbık kirâ-i kadîmi olan şehriye altı guruşa müstakıllen bana îcâr etmiş olduklarında ben dahi istîcâr ve kabûl edip lâkin zikr olunan gedik ta‘bîr olunur âlât-ı lâzıme-i ma‘lûme ber-vech-i muharrer anam mesfûr Derohi ve kız karındaşlarım mersûmetân Aranohi ve Gülgili Nasrâniyeler ile benim mâl-ı mevrûsumuz olduğunu müş‘ir temessük-i merkūmdan mâ‘adâ sened-i şer‘î olmamağla merkūmândan suâl ve esnâf-ı hâzırûn-ı merkūmûndan istihbâr olunup merkūmânın rızâ ve tasdîkleriyle sened olmak üzere kıbel-i şer‘den yedimize bir kıt‘a hüccet i‘tâ olunmak bi’l-asâle ve bi’l-vekâle matlûbumdur dedikde hâzırân-ı mezbûrân es-Seyyid Mehmed Efendi ve Ahmed Azmi Efendi’den her biri ba‘de’t-tasdîk esnâf-ı hâzırûn-ı merkūmûn dahi [19a] haber vermeleriyle hıfzen li’l-makāl mâ-vaka‘a bi’t-taleb ketb olundu. Fî-selh-i Muharremi’l-harâm sene [1]238. Şühûdü’l-hâl: Eş-şâhidûne’s-sâbıkūn.