İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 125 Hüküm no: 86 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hacı Mahmud Ağa’nın vefatı üzerine yerine Seyyid İbrahim Ağa b. Abdullah’ın eskici esnafı kethudalığına tayini Kethudâ nasbı Mahmiye-i İstanbul’da Sultan Bâyezid Hân-ı Veli -âmelehullâhu te‘âlâ bi-lutfihi’l-hafî ve’l-celî- câmi‘-i şerîfi civârında Parmak Kapısı ve mahâll-i sâirede vâki‘ bi’l-cümle Müslimîn eskici esnâfının kethudâları es-Seyyid el-Hâc Mahmud Ağa nâm kimesne bu esnâda fevt olmağla yerine esnâf-ı mezkûreden bir mu‘temed kimesne kethudâ nasbı lâzım ve mühim olmağın esnâf-ı mezkûreden olup örf ve âdetlerine vâkıf ve şurût-ı nizâmlarını arîf ve her vechile kethudâlık uhdesinden gelmeğe kādir ve cümlesinin merzî ve muhtârları idüğü esnâf-ı merkūmeden es-Seyyid Ali Ağa ve Ömer Ağa ve Mehmed Ağa ve es-Seyyid Salih Ağa ve Mustafa Alemdar ve diğer Ömer Ağa ve Mehmed Usta ve Ali Alemdar ve Mehmed Emin Usta [19b] ve Osman Usta ve Mustafa Usta ve Ali Usta ve Hasan Usta ve Halid Usta ve Abdulfettah Usta ve Ebûbekir Usta ve Molla Osman ve zimmî eskici esnâfının kethudâları Abdullah Ağa ve sâir Müslimîn haberleriyle zâhir ve mütehakkık olan işbu bâ‘isü’l-kitâb es-Seyyid İbrahim Ağa b. Abdullah’ı hâkim-i hâsim-ı vâlâ-i cenâb -veffekallâhu te‘âlâ bi’s-sıdkı ve’s-savâb- efendi hazretleri esnâf-ı mezkûre üzerine kethudâ nasb ü ta‘yîn ve esnâfından bir ferde te‘addî ve rencîde ve hilâf-ı şer‘-i şerîf tecrîm ü tekdîr ve mugāyir-i nizâm hareket etmemek üzere emr ü tenbîh buyruduklarında ol dahi kabûl ve ber-mûceb-i emr ü tenbîh amel ve hareket etmeğe ta‘ahhüd etmeğin mâ-vaka‘a [bi’t-taleb ketb olundu.] Fî 2 S sene [1]238.