İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 124 Hüküm no: 85 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Alyanak Ohannes v. Agop’un mâlik olduğu kuyumcu dükkânı için vârislerine hüccet verilmesi Beşinci kuyumcu gediği ihbârı İhrâc şüd fî 25 Ca sene [12]54 Mahrûse-i Galata’da Sultan Bâyezid mahallesinde mütemekkin bundan akdem hâlik olan Kuyumcu Alyanak Ohannes v. Agop nâm zimmînin verâseti zevce-i metrûkesi Maryem bt. Ohannes Nasrâniye ile sulbiye-i kebîre kızı Derohi ve sulbiye sagīre kızı Deronika ve sulbî sagīr oğulları Repayil ve Komidas ve Kirkor ve Karabet’e inhisârı tahakkukundan sonra mesfûretân Maryem ve Derohi Nasrâniyeler taraflarından husûs-ı âti’l-beyânda vekîl-i sâbitü’l-vekâleleri ve sıgār-ı mesfûrûnun tesviye-i emirlerine bâ-hüccet-i şer‘iye vasî-i mansûbeleri işbu hâmilü’r-rakīm Agosti v. Petrak nâm zimmî meclis-i şer‘-i hatîr-i lâzımü’t-tevkīrde mahmiye-i mezbûrede âyîneceler sûkunda kâin Kalıcılar Hanı demekle ma‘rûf kârgîr hanın taşra kapısının fevkınde tabaka-i ulyâ vasatında bir bâb kapı içinde vâki‘ beş bâb odalara bâ-temessük-i mütevellî bi’l-icâreteyn mutasarrıflar olan es-Seyyid Mehmed Efendi b. es-Seyyid Halil ile karındaşı sagīr es-Seyyid Mehmed Emin’in hâli ve tesviye-i umûruna bâ-hüccet-i şer‘iye vasî-i mansûbu Ahmed Azmi Efendi b. Mehmed ve Hancı es-Seyyid el-Hâc Mehmed Emin Ağa ve kuyumcu esnâfının kethudâsı Ali Ağa ve nâzırları Agop ve Serope ve Saraylı Artin zimmîler hâzır oldukları hâlde bi’l-vekâle ve bi’l-asâle takrîr-i kelâm ve ta‘bîr ani’l-merâm edip zikr olunan odalardan cânib-i yemînden addolundukda beşinci bir bâb odanın mukaddemâ bi’l-icâreteyn mutasarrıfı olan hâzır-ı mezbûr es-Seyyid Mehmed Efendi ve sagīr-i mezbûr es-Seyyid Mehmed Emin’in babaları müteveffâ es-Seyyid Halil Efendi’nin hayatında i‘tâ eylediği işbu yedimde olan bin iki yüz on beş senesi Şa‘bâni’l-mu‘azzamı gurresi târihiyle müverrah bir kıt‘a temessük mantûkunca şehriye altı guruş kirâ ile hâlik-i mesfûr Alyanak Ohannes zimmî müsteciri ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmesi yine hâlik-i mesfûrun ile’l-helâk yedinde mâlı ve mülkü olup ba‘de helâkihî müvekkilelerim mersûmetân ile vasîleri olduğum sıgār-ı mesfûrûna mevrûs olup zikr olunan odayı hâzır-ı mezbûr es-Seyyid Mehmed Efendi ve hâzır-ı mezbûr Ahmed Azmi Efendi kemâ-fi’s-sâbık kirâ-i kadîmi olan şehriye altı guruşa hâlik-i mersûmun veresesi mesfûrundan her birine îcâr etmiş olduklarında ben dahi istîcâr ve kabûl edip lâkin zikr olunan gedik ta‘bîr olunur âlât-ı lâzıme-i ma‘lûme ber-vech-i muharrer verese-i mersûmundan her birinin mâl-ı mevrûsları olduğunu müş‘ir temessük-i merkūmdan mâ‘adâ sened-i şer‘î olmamağla merkūmândan suâl ve esnâf-ı hâzırûn-ı merkūmundan istihbâr olunup merkūmâtın rızâ ve tasdîkleriyle sened olmak üzere kıbel-i şer‘den yedlerine bir kıt‘a hüccet i‘tâ olunmak bi’l-vekâle ve bi’l-asâle matlûbumdur dedikde hâzırân-ı mezbûrân es-Seyyid Mehmed Efendi ve Ahmed Azmi Efendi’den her biri ba‘de’t-tasdîk esnâf-ı hâzırûn-ı merkūmun dahi haber vermeleriyle hıfzen li’l-makāl mâ-vaka‘a [bi’t-taleb ketb olundu.] Fî-selh-i M sene [1]238. Şühûdü’l-hâl: Eş-şâhidûne’s-sâbıkūn.