İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 126 Hüküm no: 88 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed’in vefatı üzerine yerine Seyyid Mehmed Efendi b. Seyyid Halil’in takyeci esnafı kethudalığına tayini Kethudâ nasbı Mahmiye-i İstanbul’da kâin takyeci esnâfının kethudâları olan İbrahim Efendi b. Mehmed nâm kimesne bu esnâda fevt olmağla yerine esnâf-ı mezkûrenin örf ve âdetlerine vâkıf şurût-ı nizâmlarını arîf bir kethudâ nasbı lâzım ve mühim olmağın esnâf-ı merkūmeden olup örf ve âdetlerine vâkıf şurût-ı nizâmlarını arîf ve her vechile kethudâlık umûrunu rü’yete kādir ve cümlesinin merzî ve muhtârı idüğü Yiğitbaşı Mehmed Efendi b. Mehmed ve esnâfından Hafız Mehmed Efendi b. Mehmed Memiş ve es-Seyyid el-Hâc Mehmed Emin Ağa b. Mustafa ve Abdulkadir Ağa b. Ahmed ve el-Hâc Osman b. Mehmed ve Mehmed Odabaşı b. Mustafa ve Ahmed Ağa b. Mehmed ve Osman Efendi b. Mehmed ve İbrahim Ağa b. Mehmed Salih b. Mehmed Salih ve İsmail Ağa b. Mehmed ve sâirleri haberleriyle zâhir ve mütehakkık olan işbu bâ‘isü’l-kitâb es-Seyyid Mehmed Efendi b. es-Seyyid Halil nâm kimesneyi hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri dahi merkūm es-Seyyid Mehmed Efendi’yi esnâf-ı mezkûre üzerlerine kethudâ nasb ü ta‘yîn buyurup esnâfından bir ferde hilâf-ı şer‘-i şerîf te‘addî ve rencîde ve nizâmlarının mugāyiri tecrîm ve tekdîr etmemek üzere emr ü tenbîh buyurduklarında ol dahi kethudâlık-ı merkūmı kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a [bi’t-taleb ketb olundu.] Fî 4 S sene [1]238. Şühûdü’l-hâl: Muhzır Molla Halil, Muhzır Molla Mahmud, Muhzır Molla Hüseyin.