İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 127 Hüküm no: 89 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Paskal’ın ibrişim bükücü dükkânını Mehmed Usta b. Abdulkadir’e sattığı İbrişim bükücü Mahmiye-i İstanbul’da Fazlıpaşa Sarayı derûnunda vâki‘ ibrişim bükücü destgâhlarından zikri âtî bir aded destgâha mâlik olduğu kazzâzlar Kethudâsı Abdüllatif Ağa ve Yiğitbaşı Molla Mehmed ve bükücü esnâfından Ustabaşı Mehmed Ağa ve Ali Usta nâm kimesneler ile Mesrob ve Aci Vartan ve Yiğitbaşı Begos nâm zimmîler haberleriyle zâhir ve mütehakkık olan Petro v. Paskal nâm zimmî meclis-i şer‘-i hatîr-i lâzımü’t-tevkīrde bükücü ustalarından bâ‘is-i hâze’l-kitâb Mehmed Usta b. Abdulkadir nâm kimesne mahzarında ikrâr-ı tam ve takrîr-i kelâm edip mahmiye-i mezbûrede sâlifü’l-beyân Fazlıpaşa Sarayı derûnunda vâki‘ ibrişim bükücü destgâhlarından akd-i âti’z-zikrin sudûruna değin yedimde mâlım ve mülküm olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa merkūm Mehmed Usta’ya bey‘ ve temlik eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup merkūm Mehmed Usta’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 S sene [1]238. Şühûdü’l-hâl: Muhzır Molla Hüseyin, Muhzır Molla Halil, Muhzır Molla Mahmud.