İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 134 Hüküm no: 97 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Peredomoz v. Peraş ve Terfenoz v. Lefter’in bakkal dükkânı gediğini Bezzaz Hacı Mustafa Ağa b. Abdullah’a sattıkları Gedikpaşa’da bakkāl Mahmiye-i İstanbul’da kâin bakkāl esnâfından Peredomoz v. Peraş ve Terfenoz v. Lefter nâm zimmîler meclis-i şer‘-i hatîr-i lâzımü’t-tevkīrde bâ‘isü’l-kitâb kapan tüccârından Bezzâz el-Hâc Mustafa Ağa b. Abdullah’ın sulbî kebîr oğlu tarafından husûs-ı âti’l-beyânı tasdîka vekîl-i şer‘îsi es-Seyyid Ahmed muvâcehesinde her biri ikrâr-ı tam ve takrîr-i kelâm edip mahmiye-i mahkiyede Gedikpaşa’da çörekçi fırını karşısında kâin Ahmed Efendi dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden yüz yirmi sehm i‘tibâriyle akd-i âti’z-zikrin sudûruna değin yedimizde bâ-hüccet-i şer‘iye iştirâken ve şâyi‘an mâlımız ve mülkümüz olan altmış sehm hisse-i şâyi‘amızı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerimiz izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle müvekkil-i mezbûr el-Hâc Mustafa Ağa’ya üç bin yüz yirmi beş guruşa bey‘ ve temlik ve vech-i lâyıkı üzere teslîm eylediğimizde ol dahi yedimizden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı mezkûr üç bin yüz yirmi beş guruşu bize def‘ ü teslîm eylediğinde biz dahi yedinden bi-kadri’l-hısas bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan altmış sehm hisse-i şâyi‘ada bizim kat‘a alâka ve medhalimiz kalmayup müvekkil-i mezbûr el-Hâc Mustafa Ağa’nın mâl-ı müşterâsı ve hakk-ı sırfı olmuşdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 23 S sene [1]238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi.