İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 133 Hüküm no: 96 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rüstem Efendi b. Hacı İsmail’in sabun tablası gediğini Seyyid Mehmed Arif Ağa b. Seyyid Ömer’e sattığı Sabun tablası gediği mübâya‘ası aded 1 Târih-i asl-ı hüccet fî 17 Ra sene [1]235. Moravîzâde vakāyi‘ hücceti sicilinde Derûn-ı hüccetde ismi mezkûr Rüstem Efendi b. el-Hâc İsmail nâm kimesne meclis-i şer‘-i şerîf-i enverde kezâlik derûn-ı hüccetde mezkûru’l-ism işbu bâ‘isü’l-kitâb es-Seyyid Mehmed Ârif Ağa b. es-Seyyid Ömer nâm kimesne muvâcehesinde ikrâr-ı tam ve takrîr-i kelâm edip derûn-ı hüccetde tasrîh ve beyân kılındığı üzere mahmiye-i İstanbul’da Vâlide Yeni Câmi‘-i şerîfi havlısında mevzû‘ akd-i âti’z-zikrin sudûruna değin yedimde mülk-i müşterâm olan bir kıt‘a sabun tablası ve bir terâzî ma‘a derâhim ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile yine merkūm es-Seyyid Mehmed Ârif Ağa’ya iki bin guruşa bey‘ ve temlik ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan tabla ve sâir âlât-ı lâzımede benim kat‘a alâka ve medhalim kalmayup merkūm es-Seyyid Mehmed Ârif Ağa’nın kemâ-fi’s-sâbık emvâl-i müşterâtı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 19 S sene [1]238. Şühûdü’l-hâl: Kethudâ es-Seyyid el-Hâc İbrahim Ağa, Yiğitbaşı Molla Hüseyin, Muhzır Molla Mahmud.