İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 139 Hüküm no: 104 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafından Seyyid Mehmed Arif Ağa b. Seyyid Ömer’in sabun tablası gediğini Süleyman Ağa b. Seyyid Hasan’a sattığı Yenicâmi‘-i şerîfi havlısında sabun tablası aded 1 Mahmiye-i İstanbul’da kâin sabuncu esnâfından es-Seyyid Mehmed Ârif Ağa b. es-Seyyid Ömer nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid Süleyman Ağa b. es-Seyyid Hasan nâm kimesne muvâcehesinde ikrâr-ı tam ve takrîr-i kelâm edip mahmiye-i mahkiyede Vâlide Yeni Câmi‘-i şerîfi havlısında mevzû‘ akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir kıt‘a sabun tablası ve bir terâzî ma‘a derâhim ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Süleyman Ağa’ya iki bin beş yüz guruşa bey‘ ve temlik ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan tabla ve sâir âlât-ı lâzımede benim kat‘a alâka ve medhalim kalmayup merkūm es-Seyyid Süleyman Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 S sene [1]238. Şühûdü’l-hâl: Kethudâ es-Seyyid el-Hâc İbrahim Ağa b. Ahmed, Ali Efendi b. el-Hâc Osman, Derviş Mehmed Ağa b. Hasan, es-Seyyid Ali b. Mehmed Emin, Yiğitbaşı Molla Hüseyin.