İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 140 Hüküm no: 105 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moskohi bt. Tanal’ın berber dükkânı gediğini Mıgırdıç v. Sarab’a sattığı Berber Mahmiye-i İstanbul’da Kumkapı kurbünde Nişâncı mahallesinde mütemekkine olup şahsı zeyl-i vesîkada muharrerü’l-esâmî kimesneler ta‘rîfleriyle mu‘arrefe olan Moskohi bt. Tanal nâm Nasrâniye meclis-i şer‘-i hatîr-i lâzımü’t-tevkīrde kîseci esnâfından işbu hâmilü’r-rakīm Mıgırdıç v. Sarab nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede mârrü’l-beyân Kumkapı kurbünde [24a] İbrahim Paşa mahallesinde vâki‘Sadr-ı a‘zam-ı esbak devletlü Hurşid Paşa hazretlerinin mühürdârı efendinin konağı tahtında kâin şehriye beş guruş kadîm kirâlı bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf hissesi bir kıt‘a hüccet-i şer‘iye ile benim ve nısf-ı âharı diğer kıt‘a hüccet-i şer‘iye mantûkunca mersûm Kîseci Mıgırdıç zimmînin akd-i âti’z-zikrin sudûruna değin mâlımız ve mülkümüz olmağla ben âlât-ı lâzıme-i mezkûreden ber-minvâl-i muharrer mâlike olduğum nısf hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Mıgırdıç zimmîye iki bin yedi yüz guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ve kabûl ve semeni olan meblağ-ı merkūm iki bin yedi yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup nısfı mukaddemâ âharı hâlâ şirâen ki mecmû‘-ı âlât-ı lâzıme-i ma‘lûme mersûm Mıgırdıç zimmînin mâlı ve mülkü olmuşdur dedikde gıbbe’t-tasdîki’l-mu‘teber [mâ vaka‘a bi’t-taleb ketb olundu.] Fî 26 S sene [1]238. Şühûdü’l-hâl: Çavuş Mustafa Usta, Köşe ustası Süleyman Ağa, Kethudâ vekîli İbrahim Ağa, Şeyh Musa Efendi, Du‘âcı el-Hâc Abdullah, Yiğit [başı] es-Seyyid Mehmed Nuri.