İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 141 Hüküm no: 106 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Ali b. Abdullah’ın kadayıfçı dükkânı gediğini Ali b. Yusuf’a sattığı Draman kurbünde lokmacı ve kadayıfçı gediği Mahmiye-i İstanbul’da Dragoman kurbünde Tîhtâb hamamı ittisâlinde vâki‘ ma‘lûmü’l-hudûd zikri âtî bir bâb kadayıfçı ve lokmacı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye mâlike olan Âişe Hatun bt. Ali b. Abdullah’ın sadriye kebîre kızı tarafından husûs-ı âtiyyü’l-beyânı ikrâr ve i‘tâ-i hüccete vekîl olduğu zât-ı mezbûreyi bi’l-ma‘rifeti’ş-şer‘iye ârifân Kadayıfçı el-Hâc Mehmed Emin Ağa b. İbrahim ve Kadayıfçı el-Hâc Ali b. Ahmed nâm kimesneler şehâdetleriyle mütehakkık olup zâtı ta‘rîf-i şer‘î ile mu‘arrefe olan diğer Âişe Hatun bt. Mustafa meclis-i şer‘-i hatîr-i lâzımü’t-tevkīrde işbu bâ‘isü’l-kitâb kadayıfçı diğer el-Hâc Ali b. Yusuf nâm kimesne mahzarında bi’l-vekâle ikrâr-ı tam ve takrîr-i kelâm edip vâlidem müvekkile-i mezbûre Âişe Hatun zikr olunan Draman kurbünde Tîhtâb hamamı ittisâlinde vâki‘ bir bâb kadayıfçı ve lokmacı dükkânı derûnunda mevcûde akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan beyne’l-esnâf gedik ta‘bîr olunur âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa mezbûr kadayıfçı diğer el-Hâc Ali Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i ma‘lûme-i mezkûrede benim kat‘a alâka ve medhalim kalmayup mezbûr kadayıfçı diğer el-Hâc Ali’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 S sene [1]238. Şühûdü’l-hâl: Kadayıfçı el-Hâc Mehmed b. Hasan, Çörekçiler Kethudâsı İbrahim Ağa b. Mustafa, Çörekçi es-Seyyid Ömer Usta b. el-Hâc İsmail, Yazıcı Ali Efendi b. Süleyman, Yiğitbaşı Mehmed Usta b. Osman.