İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 142 Hüküm no: 108 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Culha esnafından Abdullah Usta b. Ahmed’in mâlik olduğu culha destgâhını Seyyid Mustafa Usta b. Seyyid Hüseyin’e sattığı Culha gediği aded 2 Âsitâne-i aliyyede vâki‘ bürüncük ve bez nesc ve i‘mâl eden culha esnâfından Abdullah Usta b. Ahmed nâm kimesne meclis-i şer‘-i şerîf-i enverde esnâf-ı mezkûreden işbu bâ‘isü’l-kitâb Küsmez demekle ma‘rûf es-Seyyid Mustafa Usta b. es-Seyyid Hüseyin nâm kimesne mahzarında ikrâr-ı tam ve takrîr-i kelâm edip esnâf-ı mezkûrenin yedlerinde bâlâsı tuğrâ-yı garrâ ile mu‘anven fermân-ı âlî-şânda zikr ü beyân olunduğu üzere diledikleri mahalle nakl şurûtundan olarak cem‘an yüz seksen iki aded culha destgâhından beyne’l-esnâf iki destgâh bir gedik i‘tibâr olunup mahmiye-i mezbûrede Eğrikapı dâhilinde Avcıbey mahallesinde kâin bir bâb dükkân derûnunda mevcûde akd-i âti’z-zikrin sudûruna değin yedimde mâlım ve mülküm olan bir gedik i‘tibâriyle iki aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm es-Seyyid Mustafa Usta’ya yedi yüz guruşa bey‘ ve temlik ve teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm yedi yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir gedik iki aded destgâh ve onlara merbût sâir âlât-ı lâzıme-i ma‘lûmede benim kat‘a alâka ve medhalim kalmayup merkūm es-Seyyid Mustafa Usta’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i S sene [1]238. Şühûdü’l-hâl: Kethudâ es-Seyyid Ahmed Ağa b. Mustafa, Yiğitbaşı Hüseyin Usta b. Mehmed, Mehmed Emin Usta b. Mehmed, diğer Hüseyin Usta b. Ahmed.