İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 143 Hüküm no: 109 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Nesibe bt. Seyyid Osman’ın mâlik olduğu yağlıkçı gediğini Hadice Hatun’a sattığı Duâ Meydanı Caddesinde yağlıkçı gediği Mahmiye-i İstanbul’da Kırkçeşme kurbünde Sunullah Efendi mahallesinde sâkine Şerîfe Nesibe bt. es-Seyyid el-Hâc Osman nâm Hatun’un li-ebeveyn er karındaşı ve tarafından husûs-ı âtiyyü’l-beyânı ikrâr ve i‘tâ-i hüccete vekîl olduğu zât-ı mezbûreyi bi’l-ma‘rifeti’ş-şer‘iye ârifân olan Mehmed Memiş Ağa b. Hüseyin ve yağlıkçılar kethudâsı Hüseyin Ağa b. Süleyman nâm kimesneler şehâdetleriyle ber-nehc-i şer‘î sâbit olan müderrisîn-i kirâm-ı zevi’l-ihtirâmdan fazîletlü Yağlıkçızâde es-Seyyid Mehmed Emin Efendi meclis-i şer‘-i şerîf-i enverde vâlideleri bâ‘isetü’l-kitâb Şerîfe Hadice Hatun bt. el-Hâc Hasan tarafından husûs-ı âtiyyü’l-beyânı tasdîka vekîli es-Seyyid Mehmed Ağa b. İbrahim mahzarında bi’l-vekâle ikrâr-ı tam ve takrîr-i kelâm edip müvekkilem kız karındaşım mezbûre Şerîfe Nesibe Hatun mahmiye-i mahkiyede Çarşı-yı Kebîr’de Bezzâzistân-ı atik civârında Duâ Meydanı Caddesinde vâki‘ bir tarafdan el-Hâc Hüseyin Ağa ve bir tarafdan İbrahim Ağa dükkânları beynlerinde kâin bir bâb yağlıkçı dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile vâlidem müvekkile-i mezbûre Şerîfe Hadice Hatun’a beş bin guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup vâlidem müvekkile-i mezbûre Şerîfe Hadice Hatun’un mâl-ı müşterâsı ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i S sene [1]238. Şühûdü’l-hâl: el-Hâc Veliyüddin Ağa, İbrahim Edhem Ağa, Hafız es-Seyyid Ömer.