İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 145 Hüküm no: 111 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütün bıçakçı esnafından Seyyid Ali Usta b. Seyyid Hasan’ın tütün bıçakçı dükkânını Mehmed Usta b. Ahmed’e sattığı Tahtakale’de tütün bıçakçı Mahmiye-i İstanbul’da kâin tütün bıçakçı esnâfından es-Seyyid Ali Usta b. es-Seyyid Hasan nâm kimesne meclis-i şer‘-i şerîf-i enverde esnâf-ı merkūmeden işbu bâ‘isü’l-kitâb Mehmed Usta b. Ahmed nâm kimesne muvâcehesinde ikrâr-ı tam ve takrîr-i kelâm edip mahmiye-i mahkiyede Tahtakale’de vâki‘ kürkçü ve attâr dükkânları beynlerinde kâin şehriye beş guruş kirâlı bir bâb tütün bıçakçı dükkân derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müstakıllen yedimde mâlım ve mülküm olmağla ben âlât-ı lâzıme-i mezkûrenin nısfı yedimde ibkā ve mâ‘adâ nısf hissesini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Mehmed Usta’ya bin altı yüz guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan bin altı yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin nısf hisse-i şâyi‘asında benim kat‘a alâka ve medhalim kalmayup merkūm Mehmed Usta’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Ra sene [1]238. Şühûdü’l-hâl: Kethudâ Mustafa Usta b. Mehmed, Yiğitbaşı es-Seyyid Halil Usta b. Ali, el-Hâc Mehmed Ali Usta b. Halil, es-Seyyid Derviş Mehmed Usta b. İbrahim, es-Seyyid Yahya Usta b. Ahmed, Halil Alemdar b. Mehmed, Muhzır Molla Halil.