İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 145 Hüküm no: 112 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Mihal v. İstirati’nin bakkal dükkânını Halil Beşe b. Abdülkerim’e sattığı İbrahim Paşa’da bakkāl Mahmiye-i İstanbul’da kâin bakkāl esnâfından Mihal v. İstirati nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden işbu bâ‘isü’l-kitâb es-Seyyid Halil Beşe b. Abdülkerim nâm kimesne muvâcehesinde ikrâr-ı tam ve takrîr-i kelâm edip mahmiye-i İstanbul’da Kumkapı dâhilinde Muhsine Hatun nâm-ı diğer İbrahim Paşa mahallesinde kâin Bekir Efendi dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ otuzar sehm hisse-i şâyi‘ası akd-i âti’z-zikrin sudûruna değin benimle gāib ani’l-meclis Kostandi nâm zimmînin yedimizde bâ-hüccet-i şer‘iye iştirâken ve şâyi‘an mâlımız ve mülkümüz olmağla ben âlât-ı lâzıme-i mezkûreden ber-i‘tibâr-ı merkūm mâlik olduğum otuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle merkūm es-Seyyid Halil Beşe’ye bin guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d otuz sehm hisse-i şâyi‘a-i mezkûrede benim kat‘a alâka ve medhalim kalmayup merkūm es-Seyyid Halil Beşe’nin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 3 Ra sene [1]238. Şühûdü’l-hâl: Muhzır Molla Mahmud, es-Seyyid Hüseyin Beşe b. es-Seyyid İbrahim, Pazarbaşı Süleyman Ağa, Bölükbaşı Abdi, Kâtib Ahmed Efendi.