İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 158 Hüküm no: 125 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Mehmed Sadık’ın habbaz fırını ve değirmenini İplikçizade Hacı Ahmed Ağa b. Süleyman’a sattığı Kasaba-i Hasköy’de iki bâb değirmen Mahmiye-i İstanbul’da vâki‘ Kapan-ı dakīk tüccârından Sadık Ağazâde Ali Ağa b. Mehmed Sadık nâm kimesne meclis-i şer‘-i hatîr-i lâzımü’t-tevkīrde yine kapan-ı merkūm tüccârından işbu bâ‘isü’l-kitâb İplikçizâde el-Hâc Ahmed Ağa b. el-Hâc Süleyman nâm kimesne mahzarında ikrâr-ı tam ve takrîr-i kelâm edip Havâss-ı Refî‘a kazâsına muzâfe kasaba-i Hasköy’de Kızılminâre mahallesinde kâin ma‘lûmü’l-hudûd bir bâb habbâz fırını ve ona merbût ittisâlinde vâki‘ sekiz horos bir bâb habbâz değirmeni derûnunda mevcûde beyne’l-esnâf gedik ta‘bîr olunur otuz iki re’s bârgir ve sâir âlât-ı lâzıme-i ma‘lûmeden sekiz re’s bârgir ve onlara isâbet eden sâir âlât-ı lâzıme-i ma‘lûme vâlidem müteveffât Âişe Hatun bt. Halil veresesinin ve mâ‘adâ yirmi dört re’s bârgir ve onlara isâbet eden sâir âlât-ı lâzıme-i ma‘lûme benim ve yine değirmen-i merkūm ittisâlinde kâin ma‘lûmü’l-hudûd üç horos bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve sâir âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûme yine vâlidem müteveffât-i mezbûre veresesinin ve mâ‘adâsı sekiz re’s bârgir ve onlara isâbet eden sâir âlât-ı lâzıme-i ma‘lûme benim yedimde mâlım ve mülküm olmağın akd-i âti’z-zikrin sudûruna değin zikr olunan habbâz değirmeni âlât-ı lâzıme-i ma‘lûmesinden ber-i‘tibâr-ı merkūm yedimde mâlım olan yirmi dört re’s bârgirden sekiz re’s bârgir ve onlara isâbet eden sâir âlât-ı lâzıme-i ma‘lûmeyi dahi bey‘ içün yedimde ibkā etmemle mâ‘adâsı olan on altı re’s bârgir sâlifü’l-beyân uncu değirmeni âlât-ı lâzıme-i ma‘lûmesinden kezâlik mülküm olan sekiz re’s bârgirden iki re’s bârgir ve onlara isâbet eden sâir âlât-ı lâzıme-i ma‘lûmeyi yine âhara bey‘ içün yedimde ibkā edip mâ‘adâsı olan altı re’s bârgir ki cem‘an iki bâb değirmenden yirmi iki re’s bârgir ve onlara isâbet eden sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ile yirmi yedi bin beş yüz guruşa merkūm İplikçizâde el-Hâc Ahmed Ağa’ya bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer yedimden iştirâ ve temellük ve tesellüm ve kabz ü kabûl edip semenleri olan meblağ-ı merkūm yirmi yedi bin beş yüz guruşun yedi bin beş yüz guruşunu bundan akdem iştirâ ve kabz eylediğim zehâir semeninden cânib-i mîrîye zimmetinde deynim olan meblağ-ı ma‘lûmü’l-mikdâr mahsûben kabzına memûra emrimle edâ ve teslîm etmekle mâ‘adâsı olan yirmi bin guruşu dahi bana def‘ ve teslîm ben dahi yedinden tamamen ahz ve kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı [30a] sahîh-i şer‘î ile ibrâ ve iskāt dahi etmemizle fîmâ-ba‘d zikr olunan iki bâb değirmenden cem‘an yirmi iki re’s bârgir onlara isâbet eden sâir âlât-ı lâzıme-i ma‘lûmede benim kat‘a alâka ve medhalim kalmayup merkūm İplikçizâde el-Hâc Ahmed Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Ra sene [1]238. Şühûdü’l-hâl: Ekmekçiler Kethudâsı Mehmed Efendi b. Ali, Uncular Kethudâsı el-Hâc Mehmed Ağa b. el-Hâc İbrahim, Kebecizâde es-Seyyid el-Hâc Mehmed Ârif Ağa b. es-Seyyid el-Hâc İsmail, es-Seyyid el-Hâc Veliyüddin Ağa b. Ali, Kırımîzâde es-Seyyid el-Hâc Musa Ağa b. el-Hâc İsmail, es-Seyyid Mustafa Ağa b. el-Hâc es-Seyyid Mehmed Emin, Hatîbzâde es-Seyyid el-Hâc Hasan Ağa b. Ali.