İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 157 Hüküm no: 124 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Mehmed Sadık’ın fırancalacı fırınını İplikçizade Hacı Ahmed Ağa b. Süleyman’a sattığı Kasımpaşa’da fırancalacı Mahmiye-i İstanbul’da vâki‘ Kapan-ı dakīk tüccârından Sadık Ağazâde Ali Ağa b. Mehmed Sadık nâm kimesne meclis-i şer‘-i hatîr-i lâzımü’t-tevkīrde yine kapan-ı merkūm tüccârından işbu bâ‘isü’l-kitâb İplikçizâde el-Hâc Ahmed Ağa b. Süleyman nâm kimesne mahzarında ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da Kulaksız nâm mahâlde vâki‘ ma‘lûmü’l-hudûd bir bâb fırancalacı fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan beş sehmi âharların ve mâ‘adâ yirmi beş sehmi benim yedimizde iştirâken mâlımız ve mülkümüz olmağın ben akd-i âti’z-zikrin sudûruna değin âlât-ı lâzıme-i mezkûreden ber-i‘tibâr-ı merkūm mâlik olduğum yirmi beş sehm hisse-i şâyi‘amın on iki buçuk sehm hissesini yedimde ibkā etmemle mâ‘ada olan on iki buçuk sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleriyle üç bin guruşa merkūm İplikçizâde el-Hâc Ahmed Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan [29b] meblağ-ı merkūm üç bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan fırancalacı fırını âlât-ı lâzıme-i ma‘lûmesinden ber-i‘tibâr-ı merkūm on iki buçuk sehm hisse-i şâyi‘asında benim kat‘a alâka ve medhalim kalmayup merkūm İplikçizâde el-Hâc Ahmed Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 11 Ra sene [1]238. Şühûdü’l-hâl: es-Seyyid Mustafa Ağa b. es-Seyyid el-Hâc Mehmed Emin, Ekmekçiler Kethudâsı Mehmed Efendi b. Ali, Uncular Kethudâsı el-Hâc Mehmed Ağa b. el-Hâc İbrahim, Kebecizâde es-Seyyid el-Hâc Mehmed Ârif Ağa b. es-Seyyid el-Hâc İsmail, es-Seyyid el-Hâc Veliyüddin Ağa b. Ali, Kırımîzâde es-Seyyid el-Hâc Musa Ağa b. el-Hâc İsmail.