İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 162 Hüküm no: 129 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav esnafından Karasova v. Sava’nın manav dükkânını Seyyid Hasan Alemdar b. Ali’ye sattığı Sermâyeci manav Mahmiye-i İstanbul’da kâin sermâyeci manav esnâfından Karasova v. Sava nâm zimmî tarafından husûs-ı âtiyyü’l-beyânı ikrâr ve i‘tâ-i hüccete vekîl olduğu Terefnoz v. Yorgaki ve Kiryako v. Apostol nâm zimmîler şehâdetleriyle ber-nehc-i şer‘î sâbit olan Mosi v. İstavri nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden işbu bâ‘isü’l-kitâb es-Seyyid Hasan Alemdar b. Ali nâm kimesne mahzarında bi’l-vekâle ikrâr-ı tam ve takrîr-i kelâm edip müvekkilim mersûm Karasova zimmî mahmiye-i mezbûre [31a] hısnı ebvâbından bahçekapısı hâricinde Eminönü nâm mahâlde vâki‘ bir tarafdan Andon oğlu Nikola ve bir tarafdan Toma oğlu Dimitri zimmîler dükkânları ve verâsı odun anbarı ve bir tarafdan tarîk-i âm ile mahdûd şehriye on iki guruş kadîm kirâlı fevkınde bir odayı müştemil Başmuhâsebe’de mukayyed şurût-ı nizâmda dâhil üç kepenk bir bâb sermâyeci manav dükkânı derûnunda mevcûde beyne’l-esnâf gedik ta‘bîr olunur bir akçe tahtası ve bir çekmece ve on iki küfe ve yirmi fıçı ve sâir âlât-ı lâzıme-i ma‘lûmenin yüz yirmi sehm i‘tibâriyle otuz sehmi mukaddemâ mezbûr es-Seyyid Hasan Alemdar’ın ve otuz sehmi kezâlik mukaddemâ yine esnâf-ı mezkûreden işbu hâzır bi’l-meclis es-Seyyid İbrahim Ağa b. es-Seyyid el-Hâc Yusuf’un mâlları ve altmış sehmi akd-i âti’z-zikrin sudûruna değin benim yedimde mâlım ve mülküm iken otuz sehmini işbu târih-i hüccet günü ile müverraha diğer bir kıt‘a hüccet-i şer‘iye mantûkunca semen-i ma‘lûm ve makbûza yine hâzır-ı mezbûr es-Seyyid İbrahim Ağa’ya bey‘ ve teslîm etmemle mâ‘adâsı olup yedimde mâlım olan otuz sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin sekiz yüz guruşa mezbûr es-Seyyid Hasan Alemdar’a bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin sekiz yüz guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı merkūm otuz sehmi mukaddemâ ve otuz sehmi hâlâ ber-minvâl-i muharrer şirâen ki cem‘an altmış sehmi mezbûr es-Seyyid Hasan Alemdar’ın mâlı ve mülkü ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 Ra sene [1]238. Şühûdü’l-hâl: Pazarbaşı es-Seyyid İbrahim Sârım Bey b. Ahmed Bey, Bölükbaşı Musa Yazıcı, Muhzır Molla Hüseyin, Muhzır Molla Mahmud.