İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 163 Hüküm no: 130 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ahmed Ağa b. Abdullah’ın berber dükkânını Mehmed Ağa b. Ali’ye sattığı Berber Mahmiye-i İstanbul’da kâin berber esnâfından Hafız Ahmed Ağa b. Abdullah nâm kimesne meclis-i şer‘-i şerîf-i enverde hâlâ Galata Başçavuşu bâ‘isü’l-kitâb Mehmed Ağa b. Ali tarafından husûs-ı âtiyyü’l-beyânı tasdîka vekîl-i şer‘îsi dergâh-ı âlî -dâme mahfûfen bi’l-me‘âlî- yeniçerilerinin altmış dört cemâ‘at ortası başkarakullukçusu diğer Mehmed Ağa b. Abdullah b. Abdi mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Kumkapı dâhilinde Çadırcı Ahmed Çelebi mahallesinde vâki‘ bir tarafdan Buyurucu Ahmed Ağa bahçesi ve bir tarafdan Yüzbiroğlu menzili arsası ve bir tarafdan re‘âyâ temekkün eylediği menâzil ve taraf-ı râbi‘i tarîk-i âm ile mahdûd ve derûnunda bir mikdâr bahçeyi müştemil şehriye altı guruş kadîm kirâlı üç kepenk bir bâb berber dükkânı derûnunda mevcûde Başmuhâsebe’de mukayyed ve mu‘teber akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan beyne’l-hıref gedik ta‘bîr olunur on ustura ve bir mikrâz ve bir cınbıs ve iki tarak ve bir mir’ât ve iki satl ve iki leğen ve iki boğaz leğeni ve yirmi havlı ve iki peşgîr ve iki şerbet güğümü ve on beş fincan ve iki maşraba ve bir kahve tası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile altı bin yedi yüz elli guruşa müvekkil-i merkūm Başçavuş Mehmed Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm altı bin yedi yüz elli guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika [31b] âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı merkūm derûnunda mevcûde gedik ta‘bîr olunur âlât-ı lâzıme-i muharrere-i mezkûrede benim kat‘a alâka ve medhalim kalmayup müvekkil-i merkūm Başçavuş Mehmed Ağa’nın emvâl-i müşterâtı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 Ra sene [1]238. Şühûdü’l-hâl: Berberler Kethudâsı vekîli İbrahim Ağa, eş-Şeyh el-Hâc Musa Efendi, Du‘âcı el-Hâc Abdullah Efendi, Yiğitbaşı es-Seyyid Mehmed Nuri, Çavuş Mustafa Ağa, Sâbık Başkarakullukçu Mustafa Ağa b. İsmail, Civelek Mahmud Ağa b. Hüseyin