İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 171 Hüküm no: 136 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Ali’nin tütüncü ve kahveci dükkânını Şerife Emetullah Hatun bt. İsmail’e sattığı Paşakapısı ittisâlinde tütüncü ve kahveci Hâlâ Dîvân-ı Hümâyûn çavuşları Mehterî es-Seyyid İbrahim Ağa b. Ali nâm kimesne meclis-i şer‘-i şerîf-i enverde zâtı ta‘rîf-i şer‘î ile mu‘arrefe olan işbu bâ‘isetü’l-kitâb Şerîfe Emetullah Hatun bt. es-Seyyid el-Hâc İsmail mahzarında ikrâr-ı tam ve takrîr-i kelâm edip mahmiye-i İstanbul’da Bâb-ı Hazret-i Sadâret-penâhî ittisâlinde vâki‘ Ma‘den Kalemi’nde Hafız Efendi ismine mukayyed bir bâb tütüncü ve kahveci dükkânı derûnunda mevcûde beyne’l-esnâf gedik ta‘bîr olunur akd-i âtiyyü’z-zikrin sudûruna değin bâ-hüccet-i şer‘iye yedimde emvâlim olan tütüncü esnâfına mahsûs âlât-ı lâzıme-i ma‘lûme ile kahveci esnâfına mahsûs bâ-defter-i müfredât eşyâ-i sâire-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûre Şerîfe Emetullah Hatun’a dört bin üç yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl [34a] ve semeni olan meblağ-ı merkūm dört bin üç yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmelerde benim kat‘a alâka ve medhalim kalmayup mezbûre Şerîfe Emetullah Hatun’un emvâl-i müşterâtı ve hakk-ı sırfı olmuşdur dedikde [’t-tasdîki’ş-şer‘î mâ-vaka‘a bi’t-taleb ketb olundu.] Fî 23 Ra sene [1]238. Şühûdü’l-hâl: Ali Çavuş b. Ahmed, es-Seyyid Veliyüddin Çavuş b. es-Seyyid İbrahim, es-Seyyid Süleyman Çavuş b. İbrahim.