İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 172 Hüküm no: 138 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Mehmed Emin’nin buğday döğücü dükkânı gediğini borcuna karşılık Mehmed Usta b. İbrahim’e rehin bıraktığı Unkapanı kapısı hâricinde buğday döğücü gediği rehni Mahmiye-i İstanbul’da Gül Câmi‘-i şerîfi mahallesinde buğday döğücü esnâfından es-Seyyid Mehmed Ağa b. Mehmed Emin nâm kimesne meclis-i şer‘-i hatîr-i lâzımü’t-tevkīrde dergâh-ı âlî yeniçerilerinin elli dokuzuncu cemâ‘at odası mütevellîsi işbu bâ‘isü’l-kitâb Mehmed Usta b. İbrahim mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Unkapanı kapısı hâricinde buğday döğücüler sûkunda kâin bir tarafı yemenici dükkânı ve tarafeyni tarîk-i âm ile mahdûd olup Arpacılar sokağına gidecek köşede vâki‘ bir bâb buğday döğücü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin beş sehm i‘tibâriyle bir sehmi gāibe ani’l-meclis Hadice Hatun’un mâlı olmağla mâ‘adâsı olup benim yedimde mâlım ve mülküm olan dört sehm hisse-i şâyi‘amı zikri âtî iktirâz ve kabz edeceğim meblağ mukābelesinde evvelâ rehin vaz‘ ve vech-i lâyıkı üzere mütevellî-i merkūm Mehmed Usta’ya teslîm eylediğimde ol dahi yedimden irtihân ve teslîm ve kabz ü kabûl ettikden sonra mütevellîsi olduğu oda-i merkūme nukūd-ı mevkūfesinden bi’t-tevliye bana beş bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semenleri işbu târih-i kitâbdan iki sene tamamına değin müeccel ve mev‘ûd yine mâl-ı vakf-ı mezkûrdan mütevellî-i merkūm yedinden iştirâ ve kabz eylediğim bir cild Riyâzü’l-Kāsımîn ve bir cild Netîcetü’l-fetâvâ kitâbları semenlerinden dahi bin beş yüz guruş ki cem‘an altı bin beş yüz guruş zimmetimde vakf-ı mezkûr içün mütevellî-i merkūm Mehmed Usta’ya vâcibü’l-edâ deynim olup bâlâda muharrer mukābelesinde rehin olan dört sehm âlât-ı lâzımeyi mütevellî-i merkūm bana i‘âre ve teslîm ben dahi isti‘âre ve kabz etmemle yedimde âriyetdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 Ra sene [1]238. Şühûdü’l-hâl: Kethudâ Mustafa Ağa b. Hüseyin, es-Seyyid Mustafa Ağa b. es-Seyyid Hasan, İsmail Ağa b. Ali, Deli Ali Usta b. Ömer, Bozlucu Mehmed Usta b. Hüseyin, es-Seyyid Mehmed Ağa b. İsmail, Kara Mustafa Ağa b. Mehmed, Süleyman Usta b. Mehmed.