İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 173 Hüküm no: 139 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Danyel’in manav dükkânını Hüseyin Beşe b. Osman’a sattığı Manav gediği Çardakönü’nde Mahmiye-i İstanbul’da Zindân kapısı hâricinde Çardakönü nâm mahâlde mütemekkin manav tâifesinden Abraham v. Danyel nâm zimmî meclis-i şer‘-i şerîf-i enverde manav esnâfından işbu bâ‘isü’l-kitâb Hüseyin Beşe b. Osman nâm kimesne mahzarında ikrâr-ı tam ve takrîr-i kelâm edip zikr olunan Çardakönü nâm mahâlde vâki‘ ma‘lûmü’l-hudûd bir bâb manav dükkânı derûnunda mevcûde beyne’l-esnâf gedik ta‘bîr olunur iki terâzî ma‘a derâhim ve bir kantar ve bir akçe tahtası ve bir çekmece ve sâir ber-mûceb-i defter-i müfredât manav esnâfına mahsûs âlât-ı lâzıme-i ma‘lûmenin yüz yirmi sehm i‘tibâriyle doksan sehmi âharın ve otuz sehm benim mâlımız ve mülkümüz olmağın ben âlât-ı lâzıme-i mezkûreden ber-i‘tibâr-ı merkūm akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan otuz sehm-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile ve âhar şerîkim izin ve icâzetleriyle bin beş yüz guruşa mezbûr Hüseyin Beşe’ye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzımede ber-i‘tibâr-ı merkūm otuz sehm hisse-i mezkûrede benim kat‘a alâka ve medhalim kalmayup mezbûr Hüseyin Beşe’nin emvâl-i müşterâtı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 R sene [1]238. Şühûdü’l-hâl: Yaşyemiş Pazarbaşısı es-Seyyid İbrahim Sârım Bey b. Ahmed Bey, Muhzır Molla Hüseyin, Bölükbaşı Musa Yazıcı ve gayruhum.