İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 180 Hüküm no: 147 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki v. Lundar ve Kostandi v. İstefan’ın mâlik oldukları bakkal dükkânlarını Mustafa Efendi’ye sattıkları Yağcı bakkāl Bakkāl tâifesinden olup kendi asıl ve şerîki Kostandi v. İstefan nâm zimmî tarafından zikri âtî gedik âlâtında olan hisse-i şâyi‘a-i ma‘lûmesini semen-i misliyle âhara bey‘a ve semenini ahz ü kabz ve bâ-defter-i müfredât ma‘lûmü’l-esâmî kimesnelere düyûnunu edâya vekîl olduğu Pazarbaşı Süleyman Ağa b. Ömer ve Bölükbaşı Abdi Ağa b. Mehmed şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Yorgaki v. Lundar nâm zimmî meclis-i şer‘-i hatîr-i lâzımü’t-tevkīrde bâ‘isü’l-vesîka Mustafa Efendi’nin pederi ve tarafından zikri câî husûsu tasdîka vekîl-i sâbitü’l-vekâlesi Nişastacı el-Hâc Hafız Mehmed Efendi b. Ömer nâm kimesne bi’l-asâle ve bi’l-vekâle ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı hâricinde Yoğurtçu sokağı nâm mahâlde Ahî Çelebi Câmi‘-i şerîfi civârında vâki‘ Taşmahzeni demekle meşhûr bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuz sehmi mezbûr el-Hâc Hafız Mehmed Efendi’nin ve mâ‘adâ kırk beş sehmden doksan sehmi benimle müvekkilim şerîkim mersûm Kostandi zimmînin yedlerimizde iştirâken ve şâyi‘an emvâlimiz olmağla hâlâ ber-vech-i muharrer mâlikler olduğumuz doksan sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Mustafa Efendi içün vekîl-i mezbûr el-Hâc Hafız Mehmed Efendi’ye bi’l-asâle ve bi’l-vekâle beş bin yüz yetmiş beş guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin yüz yetmiş beş guruşu müşterî-i müvekkil-i mezbûr Mustafa Efendi’nin mâlından olarak pederi vekîl-i merkūm el-Hâc Hafız Mehmed Efendi bana def‘ ü teslîm ben dahi yedinden bi’l-asâle ve bi’l-vekâle tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm dükkân-ı mezkûr derûnunda mevcûde gedik ta‘bîr olunan âlât-ı muharrere-i mezkûrenin ber-i‘tibâr-ı merkūm doksan sehm hisse-i şâyi‘ası müvekkil-i mezbûr Mustafa Efendi’nin emvâl-i müşterâtı ve hakk-ı sırfı olup benim ve müvekkilim ve şerîkim mersûm Kostandi zimmînin kat‘a alâka ve medhalimiz kalmamışdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 M sene 1238. Şühûdü’l-hâl: Pirinçci Köse Mustafa, Yağcı İbrahim Reis, Pirinçci es-Seyyid Mustafa Ağa, Revgan-ı zeyt Kethudâsı el-Hâc Hüseyin Ağa, Uncu Kürd Halil Ağa, Odunkapı Kethudâsı Ömer Ağa ve gayruhum.