İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 179 Hüküm no: 146 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Nikola’nın bakkal dükkânını Kosti v. Anaştaş’a sattığı Bakkāl Mahmiye-i İstanbul’da kâin bakkāl esnâfından Tanaş v. Nikola nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden işbu hâmilü’r-rakīm Kosti v. Anaştaş nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede Kiremit mahallesinde kâin Araboğlu dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharların ve mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan altmış sehm hisse-i şâyi‘amın otuz sehmini diğer bir kıt‘a hüccet-i şer‘iye ile âhara bey‘ etmemle bâkī otuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mersûm Kosti zimmîye dört yüz elli guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin dört yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan altmış sehm hisse-i şâyi‘ada benim kat‘a alâka ve medhalim kalmayup mersûm Kosti zimmînin mâl-ı müşterâsı ve hakk-ı sırfı olmuşdur gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 8 R sene 1238. Şühûdü’l-hâl: Pazarbaşı Süleyman Ağa, Kâtib Ahmed Efendi, Bölükbaşı Abdi Çelebi, Çakıroğlu Yorgi v. Asyaderyanus, Kābız-ı mâl Simyon v. Abraham, Düğenci Abraham, Yazıcı Eftat v. Mardıros, Lefter v. Anaştaş ve gayruhum.