İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 182 Hüküm no: 150 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Hafız Mehmed Salih Efendi b. Mehmed Said’in mâlik olduğu sandalcı destgâhını Süleyman Ağa b. Mehmed’e sattığı Sandalcı aded 1 Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde kâin bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı es-Seyyid Hafız Mehmed Salih Efendi b. es-Seyyid el-Hâc Mehmed Said nâm kimesne tarafından husûs-ı âti’l-beyânı ikrâr ve i‘tâ-i hüccete vekîl olduğu Yiğitbaşı Ebûbekir Ağa b. Ali ve es-Seyyid Mustafa Ağa b. Abdulkadir nâm kimesneler şehâdetleriyle ber-nehc-i şer‘î sâbit olan li-ebeveyn er karındaşı es-Seyyid Hafız Mehmed Emin Efendi meclis-i şer‘-i enverde esnâf-ı mezkûre mülâzım kalfalarından işbu bâ‘isü’l-kitâb es-Seyyid Süleyman Ağa b. Mehmed nâm kimesne mahzarında ikrâr-ı tam ve takrîr-i kelâm edip karındaşım müvekkil-i mezbûr es-Seyyid Hafız Mehmed Salih Efendi bâlâda zikr ve beyân olunan destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm es-Seyyid Süleyman Ağa’ya iki yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki yüz guruşu bana def‘ ü teslîm eylediğinde ben dahi yedinden [36b] tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup merkūm es-Seyyid Süleyman Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 8 R sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Muhzır Molla Halil, es-Seyyid el-Hâc Mehmed Said Efendi ve gayruhum.