İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 183 Hüküm no: 151 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Darbhaneli Manas v. Ohannes’in dülbentçi dükkânı gediğini Avram’a sattığı Dülbentçi Mahmiye-i İstanbul’da Langa Yenikapısı hâricinde mütemekkin Darbhâneli Manas v. Ohannes nâm zimmî tarafından husûs-ı âti’l-beyânı ikrâra vekîl olduğu Artin v. Takfor ve Merker v. Mahak nâm zimmîler şehâdetleriyle ber-nehc-i şer‘î sâbit olan diğer Artin v. Karabet nâm zimmî meclis-i şer‘-i hatîr-i lâzımü’t-tevkīrde müvekkil-i mesfûrun sulbî kebîr oğlu işbu bâ‘isü’r-rakīm Dülbentçi Avram nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkil-i mersûmun Darbhâneli Manas zimmî mahmiye-i mezbûrede Çarşı-yı Kebîr’de kâin Kebeciler Hanı ile Astar Hanı beynlerinde vâki‘ ma‘lûmü’l-hudûd bir bâb dükkân derûnunda mevcûde olup mahmiye-i mezbûrede kazzâzlar sûkunda kâin diğer dükkânında şurût-ı nizâm üzere nakl olunmuş olan beyne’l-esnâf dülbentçi gediği ta‘bîr olunur bir minder ve bir akçe tahtası ve bir endâze ve bir çekmece ve sâir âlât-ı lâzıme-i ma‘lûme akd-i âtiyyü’z-zikrin sudûruna değin bâ-hüccet-i şer‘iye yedimde mâlım ve mülküm olmağın ben ber-vech-i muharrer yedimde mâlım ve mülküm olan sâlifü’l-beyân dülbentçi âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile oğlum mesfûr Dülbentçi Avakim zimmîye beş bin guruşa bey‘ ve temlik ve teslîm eylediğimde ol dahi ber-vech-i meşrûh yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan dükkân derûnunda mevcûde dülbentçi gediği ta‘bîr olunur âlât-ı lâzıme-i merkūmede benim kat‘a alâka ve medhalim kalmayup mesfûr Dülbentçi Avakim zimmînin emvâl-i müşterâtı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 R sene 1238. Şühûdü’l-hâl: Dülbentçiler Kethudâsı Derviş Mehmed Ağa b. el-Hâc İbrahim, el-Hâc Hafız Abdülkerim Ağa, Mehmed Said Ağa, Azya oğlu Asvador zimmî v. ( ), Gülâbîoğlu Artin zimmî v. ( ), Üsküdarî Agop zimmî, Ağya zimmî, Yiğitbaşı Serkiz zimmî v. ( ) ve gayruhum.