İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 186 Hüküm no: 154 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anzaran bt. Aram’ın tütüncü dükkânını Mosis v. Avanas’a sattığı Küçükayasofya’da iki bâb tütüncü gediği Mahmiye-i İstanbul’da Gedikpaşa kurbünde Balipaşa mahallesinde mütemekkine ve şahsı ta‘rîf-i şerîf-i şer‘î [ile] mu‘arrefe olan Anzaran bt. Aram nâm Nasrâniye meclis-i şer‘-i hatîr-i lâzımü’t-tevkīrde işbu hâmilü’r-rakīm Tütüncü Mosis v. Avanes nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Küçükayasofya kurbünde kahve ve duhânî dükkânları beynlerinde kâin bir bâb tütüncü dükkânı derûnunda mevcûde beyne’l-esnâf gedik ta‘bîr olunur mukayyed ve mu‘teber tütüncü âlât-ı lâzıme-i ma‘lûmesi bâ-hüccet-i şer‘iye müstakılleten ve yine zikr olunan Küçükayasofya kurbünde Çardaklı Hamam karşısında kasab dükkânı ittisâlinde vâki‘ şehriye beş guruş on para kadîm kirâlı diğer bir bâb tütüncü dükkânı derûnunda mevcûde kezâlik beyne’l-esnâf gedik ta‘bîr olunur âlât-ı lâzıme-i ma‘lûmenin nısfı mersûm Mosis zimmînin ve mâ‘adâ nısf-ı şâyi‘ı yine benim yedimde mâlım ve mülküm olmağın akd-i âti’z-zikrin sudûruna değin ber-vech-i muharrer müstakılleten mâlike olduğum mârrü’l-beyân Küçükayasofya’da vâki‘ tütüncü dükkânı derûnunda olan âlât-ı lâzıme-i ma‘lûmemi iki bin guruşa ve zikr olunan Çardaklı hamam karşısında kasab dükkânı itîsâlinde kâin tütüncü dükkânı derûnunda mevcûde âlât-ı lâzıme-i mezkûreden ber-minvâl-i muharrer mâlike olduğum nısf hisse-i şâyi‘amı bin beş yüz guruşa ki cem‘an üç bin beş yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Mosis zimmîye bey‘ ve temlik ve teslîm eylediğimde ol dahi yedimden ber-vech-i mübeyyen iştirâ ve temellük ve tesellüm ve kabz ü kabûl ve semenleri olan meblağ-ı mecmû‘-ı mezkûr üç bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine [müte‘allika âmme-i da‘vâdan] tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup zikr olunan Küçükayasofya’da vâki‘ tütüncü dükkânı derûnunda mevcûde gedik ta‘bîr olunan âlât-ı lâzıme-i ma‘lûme ve mârrü’l-beyân Çardaklı hamam karşısında kasab dükkânı ittisâlinde kâin tütüncü dükkânı âlât-ı lâzıme-i ma‘lûmesinin dahi nısfı mukaddemâ ve nısf-ı âharı hâlâ şirâen ki mecmû‘-ı âlât-ı lâzıme-i mezkûreler mersûm Mosis zimmînin emvâl-i müşterâtı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Ca sene 1238. Şühûdü’l-hâl: Kethudâ Osman Ağa, ( ) vekîli es-Seyyid Mustafa, Yiğitbaşı es-Seyyid Abdullah Çelebi, Molla Halil el-Muhzır, Aci Artin, Tütüncü Haçador, Nîmtenci Kirostosedor ve gayruhum.