İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 185 Hüküm no: 153 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden sandalcı esnafından Mehmed Emin Ağa b. Abdullah’ın mâlik olduğu sandalcı destgâhını, vârislerinin Mehmed Ağa b. Seyyid Ali’ye sattığı Sandalcı Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde kâin bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr [37a] ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen zikr olunan sandalcı destgâhlarından iki aded destgâha mâlik olup mahmiye-i İstanbul’da Kumkapı kurbünde İbrahim Paşa mahallesinde sâkin iken bundan akdem vefât eden Sandalcı es-Seyyid Mehmed Emin Ağa b. Abdullah’ın verâseti zevce-i menkûha-i metrûkesi Hadice Hatun bt. Abdullah ile sulbiye sagīre kızı Şerîfe Fatıma’ya ba‘de’l-inhisâr zevce-i mezbûre Hadice Hatun tarafından husûs-ı âti’l-beyânda vekîl olduğu bi’l-ma‘rifeti’ş-şer‘iye zâtını ârifân Ebûbekir Ağa b. Ali ve Mehmed Usta b. Abdullah nâm kimesneler şehâdetleriyle ber-nehc-i şer‘î sâbit olan sagīre-i mezbûre Şerîfe Fatıma’nın tesviye-i umûruna bâ-hüccet-i şer‘iye vasî-i mansûbu Kalaycı Mehmed Ağa b. Ahmed nâm kimesne meclis-i şer‘-i hatîr-i lâzımü’t-tevkīrde esnâf-ı merkūmeden olup zikr olunan destgâhlardan dört aded destgâha mâlik olan işbu bâ‘isü’l-kitâb es-Seyyid Mehmed Ağa b. es-Seyyid Ali mahzarında bi’l-vekâle ve bi’l-verâse ikrâr-ı tam ve takrîr-i kelâm edip esnâf-ı merkūmenin ber-vech-i muharrer mâlik oldukları destgâhlardan bâlâda mezkûr şurût-ı nizâmda dâhil iki aded sandalcı destgâhı müteveffâ-yı mezbûr Sandalcı es-Seyyid Mehmed Emin Ağa’nın ile’l-vefât bâ-hüccet-i şer‘iye yedinde mâlı ve mülkü olup ba‘de vefâtihi hasren vârisleri zevcesi müvekkile-i mezbûre ile vasîsi olduğum sulbiye sagīre kızı mezbûreye mevrûs oldukdan sonra ben zikr olunan iki aded sandalcı destgâhlarını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile şurût-ı nizâmları üzere semen-i misli idüğü bi’l-ihbâr mütehakkık olan dört yüz guruşa mezbûr es-Seyyid Mehmed Ağa’ya bi’l-vekâle ve bi’l-vesâye bey‘ ve temlik ve teslîm eylediğimde ol dahi yedimden ber-vech-i muharrer yedimden iştirâ ve temellük ve tesellüm ve kabz ü kabûl ve semenleri olan meblağ-ı merkūm dört yüz guruşu bana def‘ ü teslîm eylediğinde ben dahi yedinden bi’l-vekâle ve bi’l-vesâye tamamen ve kâmilen ahz ü kabz ve müteveffâ-yı mezbûrun defter-i kassâmına idhâl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz ancak müvekkile-i mezbûreye izâfetle bi’l-vekâle ve bi’l-vesâye âharın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan iki aded destgâhda müvekkile-i mezbûre Hadice Hatun ile vasîsi olduğum sagīre-i mezbûre Şerîfe Fatıma’nın kat‘a alâka ve medhalleri kalmayup mezbûr es-Seyyid Mehmed Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 R sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Mehhmed Usta, Hasan Usta, Yiğitbaşı Ebûbekir Ağa ve gayruhum.