İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 189 Hüküm no: 157 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karinko bt. İstati’nin bakkal dükkânını Kozma v. Apostol’a sattığı Bakkāl Mahmiye-i İstanbul’da Fenerkapısı dâhilinde Kiremit mahallesinde mütemekkine olup şahsı ta‘rîf-i şer‘î ile [mu‘arrefe] olan Karinko bt. İstati nâm Nasrâniye meclis-i şer‘-i hatîr-i lâzımü’t-tevkīrde bakkāl esnâfından hâmilü’r-rakīm Kozma v. Apostol nâm zimmî tarafından husûs-ı âti’l-beyânı tasdîka vekîl-i şer‘îsi Petro v. Simyon nâm zimmî muvâcehesinde ikrâr-ı tam ve takrîr-i kelâm edip mahalle-i mezbûrede vâki‘ lede’l-ahâli ve’l-cîrân ma‘lûmü’l-hudûd ve’l-müştemilât Harâccızâdebaşı dükkânı demekle ma‘rûf bir bâb bakkāl dükkânı icâreteyn ile bâ-temessük-i mütevellî taht-ı tasarrufumda derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müstakılleten yedimde mâlım ve mülküm iken âlât-ı lâzıme-i mezkûrenin yüz yirmi sehm i‘tibâriyle altmış sehmini işbu târih-i hüccet günü vekîl-i mersûm Petro zimmîye diğer bir kıt‘a hüccet-i şer‘iye mûcebince semen-i makbûza bey‘ etmemle mâ‘adâsı olup akd-i âti’z-zikrin sudûruna değin yedimde mâlım ve mülküm olan altmış sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle müvekkil-i mersûm Kozma zimmîye bin dört yüz elli guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin dört yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi ettikden sonra dükkân-ı mezkûr ile derûnunda isti‘mâl olunan bir bâb kârgîr mahzenin şehriye sekiz guruş kirâlarından hissesini [38a] mukāvelemiz üzere beher mâh bana vermeğe müteahhid olmağın fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı mezkûr altmış sehmi müvekkil-i mersûm Kozma zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ca sene 1238. Şühûdü’l-hâl: Pazarbaşı Süleyman Ağa, Kâtib Ahmed Efendi, Bölükbaşı Abdi Ağa, Çakıroğlu Yorgi v. ( ), Kābız-ı mâl Simyon v. ( ), İlya v. Mihal, Lefter v. ( ), Düğenci Lazari v. ( ) ve gayruhum.