İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 190 Hüküm no: 158 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karinko bt. İstati’nin bakkal dükkânını Petro v. Simyon’a sattığı Bakkāl Mahmiye-i İstanbul’da Fenerkapısı dâhilinde Kiremit mahallesinde mütemekkine olup şahsı ta‘rîf-i şer‘î ile mu‘arrefe olan Karinko bt. İstati nâm Nasrâniye meclis-i şer‘-i hatîr-i lâzımü’t-tevkīrde bakkāl esnâfından hâmilü’r-rakīm Petro v. Simyon nâm zimmî muvâcehesinde ikrâr-ı tam ve takrîr-i kelâm edip mahalle-i mezbûrede kâin lede’l-ahâli ve’l-cîrân ma‘lûmü’l-hudûd ve’l-müştemilât Harâccıbaşı dükkânı demekle ma‘rûf bir bâb bakkāl dükkânı bi’l-icâreteyn bâ-temessük-i mütevellî taht-ı tasarrufumda ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme dahi bâ-hüccet-i şer‘iye müstakılleten yedimde mâlım ve mülküm olmağın âlât-ı lâzıme-i mezkûrenin yüz yirmi sehm i‘tibâriyle altmış sehmini işbu târih-i hüccet günü gāib ani’l-meclis Krinko v. Apostol zimmîye bey‘ etmemle mâ‘adâsı olup akd-i âti’z-zikrin sudûruna değin yedimde mâlım olan altmış sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î << ile>> ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mersûm Petro zimmîye bin dört yüz elli guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezkûr bin dört yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi << etmemizle >> ettikden sonra dükkân-ı mezkûr ile derûnunda isti‘mâl olunan bir bâb kârgîr mahzenin şehriye sekiz guruş kirâlarından hissesini mukāvelemiz üzere beher mâh bana vermeğe müteahhid olmağın fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı mezkûr altmış sehmi merkūm Petro zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ca sene 1238. Şühûdü’l-hâl: Eş-şâhidûne’s-sâbıkūn.