İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 191 Hüküm no: 160 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun bt. Osman’ın un değirmeni gediğini Mehmed Ağa b. İbrahim’e sattığı 4.000 guruşa değirmen Mahrûse-i Galata’ya muzâfe kasaba-i Tophâne’de el-Hâc Memi mahallesinde sâkine Şerîfe Âişe Hatun bt. el-Hâc Osman’ın zevci ve tarafından husûs-ı âti’l-beyânı ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân es-Seyyid el-Hâc Ömer Ağa b. es-Seyyid Mustafa ve Hüseyin Ağa b. Abdurrahman nâm kimesneler şehâdetleriyle ber-nehc-i şer‘î sâbit olan sâbıkā uncular Kethudâsı Mehmed Efendi ve el-Hâc Hüseyin meclis-i şer‘-i hatîr-i lâzımü’t-tevkīrde hâlâ uncular kethudâsı işbu bâ‘isü’l-kitâb el-Hâc Mehmed Ağa b. el-Hâc İbrahim mahzarında bi’l-vekâle ikrâr-ı tam ve takrîr-i kelâm edip mahrûse-i mezbûrede Azebkapısı dâhilinde vâki‘ Beşdirekli Hamam karşısında kâin beşdirek ta‘bîr olunur ma‘lûmü’l-hudûd üç horoslu bir bâb uncu değirmeni derûnunda mevcûde beyne’l-hıref gedik ta‘bîr olunur on iki re’s bârgir ve sâir âlât-ı lâzıme-i ma‘lûmeden sekiz re’s bârgir ve onlara isâbet eden sâir âlât-ı lâzıme-i ma‘lûme benim ve mâ‘adâ dört re’s bârgir ve onlara isâbet eden sâir âlât-ı lâzıme-i ma‘lûme zevce[m] müvekkile-i mezbûrenin yedimizde iştirâken mâlımız ve mülkümüz olmağın zevcem müvekkile-i mezbûre Şerîfe Âişe Hatun âlât-ı lâzıme-i mezkûreden akd-i âtiyyü’z-zikrin sudûruna değin ber-vech-i muharrer yedimde mâlım ve mülküm olan dört re’s bârgir ve onlara isâbet eden sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ile dört bin guruşa mezbûr el-Hâc Mehmed Ağa’ya bey‘ ve temlik ve vech-i lâyıkı üzere teslîm eylediğimizde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûreden dört re’s bârgir ve onlara isâbet eden sâir âlât-ı lâzımede benim kat‘a alâka ve medhalim kalmayup mezbûr el-Hâc Mehmed Ağa’nın mâl-ı müşterâsı ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ca sene 1238. Şühûdü’l-hâl: Ekmekçiler Kethudâsı Mehmed Efendi b. Ali, es-Seyyid el-Hâc Veliyüddin Ağa b. Ali, Hatîbzâde es-Seyyid el-Hâc Hasan Ağa b. Ali, Bedirzâde el-Hâc İsmail Ağa b. Ali.