İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 192 Hüküm no: 161 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Hüseyin’in un değirmeni gediğini Süleyman Ağa b. Mahmud’a sattığı Değirmen Mahrûse-i Galata’ya muzâfe kasaba-i Tophâne’de el-Hâc Memi mahallesinde sâkin sâbıkā uncular Kethudâsı Mehmed Efendi b. el-Hâc Hüseyin meclis-i şer‘-i hatîr-i lâzımü’t-tevkīrde Kapan-ı dakīk tüccârından bâ‘isü’l-kitâb el-Hâc Süleyman Ağa b. Mahmud tarafından husûs-ı âti’l-beyânı tasdîka vekîl-i şer‘îsi hâlâ uncular Kethudâsı el-Hâc Mahmud b. el-Hâc İbrahim mahzarında bi’l-vekâle ikrâr-ı tam ve takrîr-i kelâm edip mahrûse-i mezbûrede Azebkapısı dâhilinde vâki‘ Beşdirekli Hamam karşısında kâin beşdirek ta‘bîr olunur on iki re’s bârgir ve sâir âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûmesi vekîl-i merkūm el-Hâc Mahmud Ağa’’nın bâ-hüccet-i şer‘iye yedinde mâlı ve mâ‘adâsı olup akd-i âti’z-zikrin sudûruna değin benim yedimde mâlım ve mülküm olan sekiz re’s bârgir ve onlara isâbet eden sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile sekiz bin guruşa müvekkil-i merkūm el-Hâc Süleyman Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm sekiz bin guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i mezkûreden sekiz re’s bârgir ve onlara isâbet eden sâir âlât-ı lâzıme-i ma‘lûmede benim kat‘a alâka ve medhalim kalmayup müvekkil-i mezbûr el-Hâc Süleyman Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ca sene 1238. Şühûdü’l-hâl: Eş-şâhidûne’s-sâbıkūn.